Гістарычная падзея адбылася 4 снежня ў Ватыкане падчас традыцыйнай агульнай аўдыенцыі: упершыню ў гісторыі прагучаў кароткі агляд папскай катэхезы на кітайскай мове.
Пра гэта паведаміла Беларуская рэдакцыя парталу Vatican News.
«Сёння з вялікім задавальненнем пачынаем чытанне кароткага зместу катэхезы на кітайскай мове», — сказаў Папа Францішак, звяртаючыся да прысутных кітайскіх вернікаў і тых, хто далучыўся да трансляцыі праз сродкі масавай камунікацыі. «Малюся аб радасці і супакоі для ўсіх вас і вашых сем’яў. Няхай вас Бог благаславіць!» — дадаў Папа.
Падзея стала важным крокам у развіцці дыялогу паміж Святым Пасадам і Кітаем, які ў апошнія гады набывае новую дынаміку. Варта адзначыць, што Папа Францішак неаднаразова выказваў жаданне наведаць Кітай і сустрэцца з кітайскімі католікамі, якія з’яўляюцца рэлігійнай меншасцю ў гэтай краіне.
Выкарыстанне кітайскай мовы падчас папскай аўдыенцыі таксама сведчыць пра ўніверсальнасць Каталіцкага Касцёла і яго адкрытасць да ўсіх народаў свету.
