У суботу 29 лютага ў Жэневе адбудзецца гістарычная падзея: тут упершыню з 1535 года будзе цэлебравацца святая Імша ў старажытнай катэдры святога Пятра, якая амаль пяць стагоддзяў таму стала рэфармацкай.
Як паведаміла Каталіцкае інфармацыйнае агенцтва КАІ, Эўхарыстыю ўзначаліць каталіцкі біскуп Лазаны, Женевы і Фрыбура Шарль Марэро.
У 1536 годзе па рашэнні гарадской рады Жэневы ў горадзе было ўведзена рэфармаванае набажэнства, і з таго часу колішняя каталіцкая катэдра святога Пятра стала галоўным пратэстанцкім зборам для прыхільнікаў і паслядоўнікаў Жана Кальвіна, якога называлі «жэнеўскім папам».
Запрашэнне цэлебраваць тут святую Імшу стала важным экуменічным жэстам з боку кальвіністаў у адносінах да Каталіцкага Касцёла.
Старшыня Папскай рады спрыяння хрысціянскаму адзінству кардынал Курт Кох, які сам паходзіць са Швейцарыі, назваў запланаваную ў сталіцы кальвінізму гістарычную падзею «вялікім сімвалам адзінства хрысціянаў».
У швейцарскіх і французскіх СМІ звяртаецца ўвага на тое, што яшчэ некалькі гадоў таму немагчыма было сабе нават уявіць, што такое стане магчымым.
Усё, што ў велічнай жэнеўскай катэдры святога Пятра было звязана з каталіцтвам, знішчылі пасля прамоўленага 8 жніўня 1535 года казання Гіёма Фарэля, у якім ён абвясціў асновы рэфармацыі. Да 1538 года тут прапаведаваў Жан Кальвін, пакуль яго самога не выгналі з Жэневы, але катэдра пры гэтым увесь час заставалася і застаецца рэфармацкай.
Відаць, невыпадкова для незвычайнай падзеі быў выбраны незвычайны дзень.
29 лютага з’яўляецца апошнім днём апошняга зімовага месяца толькі раз у чатыры гады, у высакосным годзе. У звычайныя гады месяц люты мае толькі 28 дзён.
