Швейцарыя скіравала запрашэнне Ватыкану ўзяць удзел у канферэнцыі па міры ва Украіне, якая пройдзе ў сярэдзіне чэрвеня без удзелу Расіі.
Пра гэта ў інтэрв’ю выданню Blick, апублікаваным 5 мая, сказала федэральны прэзідэнт Швейцарыі Віёла Амхэрд.
У суботу яна сустрэлася з Папам Францішкам і, паводле яе словаў, сярод пытанняў, якія абмяркоўваліся, была і вайна ва Украіне. На пытанне газеты аб тым, ці прыедзе Папа на мірную канферэнцыю ў Швейцарыі, Амхэрд адказала:
«Ватыкан вельмі станоўча ставіцца да мірнай канферэнцыі».
Прэзідэнт таксама пацвердзіла, што скіравала запрашэнні Бразіліі, Індыі, Кітаю і ПАР — усе гэтыя краіны, разам з Расіяй, уваходзяць у групу БРІКС, уяўляючы сабой найбуйнейшыя краіны свету, якія развіваюцца. Паводле прэзідэнта Амхэрд, рэакцыя гэтых краін на запрашэнні была «пазітыўнай». Пакуль, аднак, няма афіцыйнага пацверджання ўдзелу іх прадстаўнікоў у канферэнцыі, якая пройдзе 15–16 чэрвеня на швейцарскім курорце Бюргеншток.
Як адзначыла Віёла Амхэрд, яна спадзяецца на «шырокі ўдзел» у канферэнцыі, якая, паводле яе словаў, будзе прысвечана чатыром асноўным тэмам: гуманітарным аспектам, ядзернай бяспецы, свабодзе суднаходства і харчовай бяспецы. Усе гэтыя пункты ўваходзяць у так званую «формулу міру прэзідэнта Украіны Уладзіміра Зяленскага.
«Яшчэ адным поспехам было б, калі б мы змаглі канкрэтна падысці да мірнага працэсу», — сказала прэзідэнт Швейцарыі.
