10 снежня ў Мукачаве на Закарпацці (Украіна) адбылося біскупскае пасвячэнне айца Міколы Лучка ОР, якога 11 лістапада папа Францішак менаваў дапаможным біскупам Мукачаўскай дыяцэзіі.
Як паведаміў партал Credo, біскупскае пасвячэнне першаму ўкраінскаму іерарху з дамініканскага ордэна ўдзяліў Апостальскі нунцый ва Украіне арцыбіскуп Клаўдыё Гуджэроцці разам з Мітрапалітам Львоўскім арцыбіскупам Мечыславам Макшыцкім і Мукачаўскім біскупам Анталам Майнэкам.
У біскупскім гербе новага закарпацкага пастыра змешчаны чорна-белы крыж на чорна-белым фоне — сімвал Ордэна Прапаведнікаў, дамініканаў, з якога Папа паклікаў айца Міколу Лучка на біскупскае служэнне.
У правай частцы герба відаць палаючае сэрца на чырвоным фоне — знак Божай Міласэрнасці, пра якое нагадвае таксама і дэвіз новага ўкраінскага біскупа: Misericordia — «Міласэрнасць».
Ён суадносіцца з канкрэтным тэкстам Святога Пісання, а менавіта з Евангелля паводле святога Лукі: «Будзьце міласэрнымі, як і Айцец ваш міласэрны» (Лк 6, 36).
У левай частцы герба — зорка на блакітным фоне, што азначае Езуса і Марыю.
Біскуп Мікола Лучок стаў першым біскупам дамініканінам у рыма-каталіцкім епіскапаце Украіны. Іерарх, які паходзіць з Закарпацця, будзе служыць у сваёй роднай дыяцэзіі.
