21 лістапада папа Францішак, які знаходзіцца з Апостальскім візітам у Тайландзе, сустрэўся з мясцовымі ўладамі і каралём, з духоўным лідарам мясцовых буддыстаў, якія складаюць абсалютную большасць у гэтай краіне, наведаў пацыентаў каталіцкага шпіталя, а ўвечары цэлебраваў святую Імшу для 50 тысяч вернікаў.
Сустрэча Святога Айца з пацыентамі і медперсаналам шпіталя святога Людвіка ў Бангкоку стала выразам прызнання вялікага ўнёску тайскага Касцёла ў справы міласэрнасці. Гэты каталіцкі шпіталь, заснаваны 120 гадоў таму, лічыцца не толькі адным з лепшых у Тайландзе: сюды прыязджаюць лячыцца нават хворыя з суседніх краін. Тут вядуцца таксама грунтоўныя навуковыя доследы ў галіне медыцыны.
У гэтай установе аховы здароўя, якой з самага пачатку апякуецца французская супольнасць святога Паўла з Шартра, трымаюцца правіла Ubi caritas, Deus ibi est — «Дзе любоў, там Бог».
Як паведамляе польская рэдакцыя партала Vatican News, візіт папы Францішка стаў значнай падзеяй для хворых.
Увечары Папа цэлебраваў святую Імшу на нацыянальным стадыёне ў Бангкоку, якая сабрала больш за 50 тысяч удзельнікаў.
У прамоўленай гаміліі пастыр паўсюднага Касцёла нагадаў, што Езус пераадольваў рэлігійныя і прававыя абмежаванні свайго часу, а таксама не дазваляў нікому Ім завалодаць і выкарыстоўваць у сваіх карыслівых мэтах.
«Евангелле — гэта запрашэнне і бясплатнае права для ўсіх, хто жадае яго слухаць», — сцвердзіў пры гэтым Пантыфік.
