Папскае таварыства «Дапамогі Касцёлу ў патрэбе» (Aid to the Church in Need) працягне акцыю, падчас якой славутыя помнікі архітэктуры і святыні ў розных краінах афарбуюцца ў чырвоны колер «крыві мучанікаў».
Як паведамляе польская рэдакцыя парталу Vatican News, ад Вашынгтона да Сіднэя і ад Манілы да Рыма мноства славутых будынкаў будзе падсветлена чырвоным святлом, каб людзі ў свеце не закрывалі вочы на мучаніцтва хрысціянаў.
Акцыя праходзіць у межах так званага «Чырвонага тыдня», які на практыцы працягваецца цэлы год, каб данесці да шырокай грамадскасці трывожную вестку пра пераслед хрысціянаў у многіх краінах свету.
Так, 80% актаў рэлігійнага пераследу, якія фіксуюцца ў свеце, скіраваныя супраць хрысціянаў. 245 млн вызнаўцаў Хрыста церпяць пераслед за веру, прычым больш чым у 95-і краінах яны сутыкаюцца з пераследам штодзённа. У сярэднім штодзённа ў свеце гіне адзінаццаць хрысціянаў.
У колер «крыві мучанікаў» ужо некалькі гадоў афарбоўваюцца Калізей і фантан Трэві ў Рыме, парыжская базыліка Сакрэ-Кёр, а таксама славутая статуя Хрыста ў Рыа-дэ-Жанэйра.
Мэта «Чырвонага тыдня» — нагадаць пра адзінства Касцёла і права свабодна вызнаваць сваю веру ў Хрыста ва ўсім свеце.
Да акцыі далучылася, між іншым, Аўстралія, дзе ў бліжэйшыя дні ў чырвоны колер афарбуюцца сем катэдральных касцёлаў у такіх гарадах, як Сіднэй, Брысбэн і Мэльбурн. У Вялікабрытаніі будзе падсветлена трынаццаць катэдраў і 130 іншых будынкаў, у тым ліку і Вэстмінстэрскі палац. З найбольшым размахам акцыя сёлета пройдзе на Філіпінах, дзе пра мучаніцтва хрысціянаў нагадаюць больш за дзве тысячы парафій з 68-і розных дыяцэзій.
