Пошук


10.10.2019 15:46   Catholic.by
Караль і Эмілія Вайтылы са старэйшым сынам Эдмундам. Фота: radiomaryja.pl

9 кастрычніка Канферэнцыя епіскапату Польшчы дала афіцыйную згоду на распачацце беатыфікацыйнага працэсу бацькоў святога Яна Паўла ІІ.

Як паведаміла Каталіцкае інфармацыйнае агенцтва КАІ, сабраныя на 384-м пленарным пасяджэнні польскага епіскапату біскупы выказалі сваю згоду на тое, каб можна было распачаць беатыфікацыйны працэс Караля і Эміліі Вайтылаў — бацькоў святога Яна Паўла ІІ.

Бацька будучага папы Караль нарадзіўся 18 ліпеня 1879 года ў прадмесці горада Бельска-Бялай на поўдні Польшчы, ля падножжа Бескідскіх гораў. 10 лютага ён ажаніўся з Эміліяй з роду Качароўскіх, маці будучага папы, якая нарадзілася 26 сакавіка 1884 года ў Кракаве. Сужонкі мелі траіх дзетак: Эдмунда, Вольгу Марыю і Караля Юзафа — будучага папу Яна Паўла ІІ.

Іх дачушка Вольга Марыя памерла нованароджанай, сын Эдмунд быў доктарам і памёр падчас эпідэміі скарлатыны ва ўзросце 26-і гадоў.

Эмілія адышла ў вечнасць 13 красавіка 1929 года ва ўзросце 45-і гадоў, калі яе малодшаму сыну Каралю Юзафу не споўнілася яшчэ і дзевяці гадкоў. Яе муж Караль адышоў у вечнасць 18 лютага 1941 года, падчас Другой сусветнай вайны.

Караль Юзаф Вайтыла, які 16 кастрычніка 1978 года быў абраны Папам і прыняў імя Ян Павел ІІ, на ўсё жыццё захаваў светлыя і ўдзячныя ўспаміны пра сваіх бацькоў, якіх рана страціў.

Рашэнне Канферэнцыі епіскапату Польшчы дае магчымасць звярнуцца да Святога Пасаду па дазвол на распачацце беатыфікацыйнага працэсу на дыяцэзіяльным узроўні.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа