9 кастрычніка Канферэнцыя епіскапату Польшчы дала афіцыйную згоду на распачацце беатыфікацыйнага працэсу бацькоў святога Яна Паўла ІІ.
Як паведаміла Каталіцкае інфармацыйнае агенцтва КАІ, сабраныя на 384-м пленарным пасяджэнні польскага епіскапату біскупы выказалі сваю згоду на тое, каб можна было распачаць беатыфікацыйны працэс Караля і Эміліі Вайтылаў — бацькоў святога Яна Паўла ІІ.
Бацька будучага папы Караль нарадзіўся 18 ліпеня 1879 года ў прадмесці горада Бельска-Бялай на поўдні Польшчы, ля падножжа Бескідскіх гораў. 10 лютага ён ажаніўся з Эміліяй з роду Качароўскіх, маці будучага папы, якая нарадзілася 26 сакавіка 1884 года ў Кракаве. Сужонкі мелі траіх дзетак: Эдмунда, Вольгу Марыю і Караля Юзафа — будучага папу Яна Паўла ІІ.
Іх дачушка Вольга Марыя памерла нованароджанай, сын Эдмунд быў доктарам і памёр падчас эпідэміі шкарлятыны ва ўзросце 26-і гадоў.
Эмілія адышла ў вечнасць 13 красавіка 1929 года ва ўзросце 45-і гадоў, калі яе малодшаму сыну Каралю Юзафу не споўнілася яшчэ і дзевяці гадкоў. Яе муж Караль адышоў у вечнасць 18 лютага 1941 года, падчас Другой сусветнай вайны.
Караль Юзаф Вайтыла, які 16 кастрычніка 1978 года быў абраны Папам і прыняў імя Ян Павел ІІ, на ўсё жыццё захаваў светлыя і ўдзячныя ўспаміны пра сваіх бацькоў, якіх рана страціў.
Рашэнне Канферэнцыі епіскапату Польшчы дае магчымасць звярнуцца да Святога Пасаду па дазвол на распачацце беатыфікацыйнага працэсу на дыяцэзіяльным узроўні.
