22 верасня ў Польшчы завяршыўся 34-ы Міжнародны каталіцкі фестываль фільмаў і мультымедыйных праграм. У намінацыі гістарычнай дакументалістыкі першую ўзнагароду атрымала стужка «Касцёл на Крыжы», у якой распавядаецца пра пераслед веры ў Беларусі.
На прадстаўнічы кінаконкурс, арганізаваны Каталіцкім кінатаварыствам імя святога Максімільяна Кольбэ, сёлета было даслана больш за 60 прац з розных краін: Беларусі, Венесуэлы, Гватэмалы, Ганконга, ЗША, Індыі, Іспаніі, Латвіі, Польшчы, Украіны, Філіпінаў і Швецыі.
Фестываль адбываецца пад патранатам біскупа Рамуальда Камінскага, ардынарыя Варшаўска-Пражскай дыяцэзіі. Журы разглядала працы, прадстаўленыя ў васьмі намінацыях: мастацкія фільмы, фільмы пра Найсвяцейшую Панну Марыю, дакументальныя фільмы, гістарычная дакументалістыка, тэлепраграмы і мультымедыйныя праграмы, аматарскія фільмы, тэледыскі і радыёперадачы.
У намінацыі гістарычнай кінадакументалістыкі першую ўзнагароду атрымаў фільм «Касцёл на Крыжы» маладой беларускай рэжысёркі Касі Растоцкай.
Стужка апавядае пра людзей, якія без зброі паўсталі супраць магутнай сістэмы, пра змаганне савецкіх уладаў з Касцёлам і пра знішчэнне святыняў на тэрыторыі СССР і сучаснай Беларусі.
Героі фільму, якія сталі сведкамі тых трагічных падзеяў, простымі словамі распавядаюць гісторыі, ад якіх і сёння сціскаецца сэрца і мароз бяжыць па скуры.
