26 жніўня ў Польшчы адзначылі ўрачыстасць Маці Божай Чэнстахоўскай. У гэты дзень Нацыянальны санктуарый на Яснай Гары наведала каля 40 тысяч пілігрымаў.
Як паведамляе Каталіцкае інфармацыйнае агенцтва КАІ, галоўныя адпустовыя ўрачыстасці, у якіх бралі ўдзел усе польскія біскупы і кіраўнік Украінскай Грэка-Каталіцкай Царквы Першавярхоўны арцыбіскуп Святаслаў Шаўчук, узначаліў Прымас Польшчы арцыбіскуп Войцех Поляк.
У Касцёле на Беларусі таксама адзначаўся ўспамін Найсвяцейшай Панны Марыі Чэнстахоўскай, культ якой распаўсюджаны і на нашых землях.
Сёлетні Яснагорскі фэст праходзіў у духу падзякі за Першую пілігрымку на радзіму Папы-паляка святога Яна Паўла ІІ, а таксама ў інтэнцыі перапрашэння за «раненні аблічча Марыі».
«Давайце спынім братазабойчыя сваркі, давайце перастанем правакаваць спрэчкі і падзелы», — заклікаў арцыбіскуп Поляк.
Прымас падкрэсліў, што Марыя як Маці сям’і жадае аберагаць нас усіх разам, таму нельга выкарыстоўваць Яе выявы дзеля ўласных выгодаў асобных людзей і груп, у ідэалагічных ці палітычных мэтах і ўздымаць на знамёны змагання.
Іерарх нагадаў, што 40 гадоў таму на Яснай Гары святы Ян Павел ІІ заклікаў да справядлівасці і любові, што з’яўляюцца ўмоваю адзінства народа, і прасіў:
«Давайце не правакаваць адзін аднаго. На нянавісць і пагарду адкажам любоўю, адкажам нашай вернасцю Евангеллю Хрыста».
Арцыбіскуп Гнезненскі падкрэсліў, што не ведае такой маці, якая б радавалася нязгодзе, нянавісці і падзелам у сям’і.
«Марыя, наша Маці, не радуецца нязгодзе сваіх дзяцей», — зазначыў Прымас.
А. Арнольд Храпкоўскі OSPPE, Генерал ордэна паўлінаў, якія апякуюцца Яснагорскім санктуарыем, у сваю чаргу сцвердзіў:
«Мы жывем глыбокай упэўненасцю ў тым, што калі ўсе чалавечыя агні згасаюць, тады заўсёды застаецца Найсвяцейшая Панна Марыя з Чэнстаховы і Касцёл».
Ён нагадаў, як у гэтым святым для ўсіх палякаў месцы святы Ян Павел ІІ вучыў суайчыннікаў таму, што значыць жыць годнасцю Божага дзіцяці.
Учарашнія адпустовыя ўрачыстасці ў Чэнстахове сабралі больш пілігрымаў, чым у мінулым годзе. Сёлета ў ста групах да цудатворнай іконы Чорнай Мадонны пешкі прыйшло 36,5 тысяч пілігрымаў.
Усяго ў гэтым пілігрымкавым сезоне пачынаючы з мая на Ясную Гару прыбыло ажно 134 тысячы чалавек — на адзінаццаць тысяч больш, чым летась.
Сёлетнія пілігрымкі праходзілі ў духу малітвы да Духа Святога аб аднаўленні Касцёла і аблічча польскай зямлі, аб адзінстве народа, за святароў.
Вандроўнікі да святыні дзякавалі за Першую пілігрымку св. Яна Паўла ІІ у Польшчу і яго любоў да Нябеснай Каралевы, а таксама перапрашалі за знявагі, асабліва Маці Божай у Яе Яснагорскай выяве.
Урачыстасці ў Чэнстахове завяршыліся Эўхарыстычнай працэсіяй і святочным спевам Яснагорскага апэля перад цудадзейным абразом.
