Урачыстасць Беззанннага Зачацця ў Нацыянальным Марыйным санктуарыі ў польскай Чэнстахове сёлета будзе мець асаблівы характар.
Як са спасылкай на прэс-службу санктуарыя паведамляецца на старонцы польскага епіскапату, 8 снежня прыпадае 70-я гадавіна з’яўлення Яснагорскага апэля — аднаго з найбольш важных у краіне Марыйных набажэнстваў.
Гэтая малітва, якая адбываецца штовечар а 9-й гадзіне ў інтэнцыі Касцёла і Бацькаўшчыны, збірае ў Чэнстахоўскім санктуарыі не толькі мясцовых жыхароў і пілігрымаў, але таксама людзей па ўсёй краіне і за мяжой, якія ўдзельнічаюць у ёй з дапамогай сродкаў масавай камунікацыі.
Як адзначаецца, 70-я гадавіна апэля будзе на Яснай Гары момантам вялікай падзякі. У базыліцы санктуарыя адбудзецца тэлеканцэрт пад назваю «Малітва пакаленняў» з прамой трансляцыяй. У той жа дзень на Яснай Гары адбудзецца прэзентацыя паштовай маркі, выпушчанай польскай поштай у гонар Яснагорскага апэля. Само набажэнства ў дзень круглай гадавіны правядзе ў яснагорскай капліцы перад цудадзейным абразом Маці Божай Чэнстахоўскай Прымас Польшчы арцыбіскуп Войцех Поляк.
Ідэя набажэнства апэля з’явілася 8 снежня 1953 года ў капліцы Маці Божай. Тады некалькі асоб на чале з тагачасным прыёрам яснагорскага кляштара айцоў паўлінаў разам маліліся аб вызваленні зняволенага камуністычнымі ўладамі Прымаса Польшчы кардынала Стэфана Вышынскага і за Бацькаўшчыну.
