Ва Украіне распачаліся пілігрымкі ў санктуарый Маці Божай у Бальшаўцах, што ў Галіцкім раёне Івана-Франкоўскай вобласці. У іх бяруць удзел таксама вернікі з Беларусі.
9 ліпеня з Каменкі-Бужскай выйшла група пілігрымаў благаслаўлёнага Якуба Стрэпы. Частку шляху з імі прайшоў Мітрапаліт Львоўскі арцыбіскуп Мечыслаў Макшыцкі. Свой шлях 9 ліпеня распачала таксама пілігрымка са Снятына і Забалотава.
Раніцай 10 ліпеня да Маці Божай Бальшавецкай ад санктуарыя святога Антонія ў Львове стартавала штогадовая пешая пілігрымка міру і адзінства, якую традыцыйна арганізуюць канвентуальныя францішкане.
Арцыбіскуп Мечыслаў Макшыцкі заклікаў яе ўдзельнікаў да малітвы за мір ва Украіне і аб асвячэнні сем’яў.
Іерарх узначаліў цэлебрацыю святой Імшы з удзелам пілігрымаў і прайшоў разам з імі вуліцамі Львова.
«Ліпень у Касцёле ва Украіне — гэта месяц пілігрымак, бо ў гэты час мы ідзем у наш Нацыянальны санктуарый у Бярдычаве, у Латычаве, а таксама ў санктуарый Львоўскай дыяцэзіі ў Бальшаўцах», — сказаў арцыбіскуп Макшыцкі карэспандэнту КАІ.
«Я рады, што ўжо мог сустрэцца з пілігрымамі з Каменкі-Бужскай, прывітаць іх і падзякаваць ім за тое, што яны прысвячаюць свой час малітве, гэтым „рэкалекцыям у дарозе“, сустрэчы са сваімі блізкімі, знаёмымі; за тое, што яны ўзносяць свае малітвы за ўвесь наш Касцёл, а таксама за тых, хто даручае сябе нашым малітвам.
Сёлета мы перажываем асаблівы час, паколькі ва Украіне гэты год прысвечаны святасці сям’і і сужэнства. Мы молімся за нашыя сем’і, за дзяцей у сем’ях, каб яны маглі расці ў добрых умовах, каб бацькі мелі працу і забяспечылі сваім дзецям годныя ўмовы жыцця», — зазначыў арцыбіскуп Макшыцкі.
Іерарх дадаў, што адначасова са львоўскай выйшла таксама пілігрымка з Цярнопаля, а ў пятніцу ў Бальшаўцы скіруюцца пілігрымы з Івана-Франкоўска.
У пілігрымках бяруць удзел таксама вернікі з усходняй Украіны, з Беларусі і з Польшчы.
Усе пілігрымы сустрэнуцца ў Бальшаўцах, дзе з 13 па 17 ліпеня пройдзе XVII францішканская сустрэча моладзі на тэму «Валадар пярсцёнкаў».
Асноўныя ўрачыстасці ў бальшавецкім санктуарыі адбудуцца ў нядзелю 14 ліпеня.
У гэты дзень кіраўнік украінскага каталіцкага епіскапату лацінскага абраду біскуп Адэска-Сімферопальскі Браніслаў Бярнацкі здзейсніць урачыстую інтранізацыю копіі абраза Маці Божай Бальшавецкай, арыгінал якой знаходзіцца ў Гданьску (Польшча). Пасля Другой сусветнай вайны яго вывезлі туды айцы кармэліты, вымушаныя пакінуць тэрыторыю Савецкага Саюзу.
