Як паведаміла беларуская рэдакцыя партала Vatican News, 14 лютага папа Францішак прызначыў Камерленга Святога Рымскага Касцёла, якім стаў кардынал Кэвін Джозэф Фарэл (Kevin Joseph Farrell), прэфект Дыкастэрыі па справах свецкіх, сям’і і жыцця.
71-гадовы амерыканскі іерарх ірландскага паходжання Кэвін Джозэф Фарэл, былы арцыбіскуп Даласа, з 15 жніўня 2016 г. узначальвае Дыкастэрыю па справах свецкіх, сям’і і жыцця. Кардынальскую годнасць атрымаў 19 лістапада 2016 г. Ён змяніў на пасадзе Камерленга кардынала Жана-Луі Тарана, памерлага 5 ліпеня 2018 г.
Пасада Камерленга Святога Рымскага Касцёла з’яўляецца адной з дзвюх самых высокіх у Касцёле (разам з Дзяржсакратаром), якія захоўваюцца са смерцю або адстаўкай Папы. Падчас sede vacante (адсутнасці Папы) менавіта ён кіруе фінансамі і ўласнасцю Касцёла.
Больш канкрэтна задачы і функцыі Камерленга вызначаюць дзве Апостальскіх канстытуцыі св. Яна Паўла II: Pastor Bonus («Добры Пастыр», 1988 г.) і Universi Dominici gregis («Паўсюднай паствы Пана», 1996 г.). У першым дакуменце гаворыцца, што Камерленга Святога Рымскага Касцёла павінен афіцыйна сцвердзіць смерць Папы і апячатаць яго кабінет і кватэру, а затым зрабіць тое ж з усімі папскімі апартаментамі. Менавіта ён адказвае за паведамленне пра смерць Святога Айца кардыналу-вікарыю Рыма, які, у сваю чаргу, афіцыйна перадае гэту навіну жыхарам горада. Таксама ў яго часовае распараджэнне пераходзіць Апостальскі палац у Ватыкане, палацы на Латэране і ў Кастэль Гандольфа.
Папярэднім Камерленга Святога Рымскага Касцёла быў Жан-Луі Таран (2014–2018 гг.), які 13 сакавіка 2013 г. абвясціў свету пра абранне папы Францішка, а ў ліпені таго ж года як прадстаўнік Святога Айца ўзначаліў юбілейныя ўрачыстасці ў Будславе ў 400-ю гадавіну з’яўлення там цудатворнага абраза Маці Божай.
