Як паведамляе беларуская рэдакцыя Vatican News, 13 студзеня, у свята Хросту Пана, у Сіксцінскай капэле Папа ўдзяліў сакрамэнт хросту 27 немаўлятам: 12 хлопчыкам і 15 дзяўчынкам.
Папа адзначыў, што сям’я з’яўляецца асноўным асяроддзем веры.
Падчас імправізаванай гаміліі Папа Францішак звярнуў увагу на найбольш важную задачу бацькоў — перадачу веры сваім дзецям. І гэта трэба рабіць як словамі, так і ўсім жыццём. Пазней дзіця будзе пазнаваць праўды веры праз катэхізацыю, але аснову павінна даць сям’я, падкрэсліў ён.
Вельмі важнай педагагічнай задачай Пантыфік лічыць стварэнне правільнай, спакойнай атмасферы ў сям’і.
Ён звярнуўся да бацькоў і заклікаў іх пазбягаць сварак у прысутнасці дзяцей.
Святы Айцец адзначыў, што спрэчкі і нават сваркі — гэта не заўсёды дрэнна, таму што яны дазваляюць высветліць многія рэчы, але гэта павінна адбывацца не пры дзецях, каб яны не бачылі і не чулі павышаных галасоў, паколькі гэта нараджае ў іх неспакой.
Большасць ахрышчаных немаўлятаў — гэта дзеці супрацоўнікаў розных устаноў Дзяржавы Ватыкан і Святога Пасаду. Эўхарыстую разам з Пантыфікам канцэлебравалі,кардынал Конрад Краеўскі і арцыбіскупы Георг Генсвайн, Джамп’ера Глодэр і Фернанда Вэрхес.
