Пошук


03.06.2018 12:50   Паводле: Vatican News / Catholic.by

2 чэрвеня прэс-служба Святога Пасаду паведаміла, пра што ішла гаворка падчас сустрэчы папы Францішка з дэлегацыяй Рускай Праваслаўнай Царквы на чале з кіраўніком аддзела знешніх царкоўных сувязяў Маскоўскага Патрыярхату мітрапалітам Валакаламскім Іларыёнам (Алфеевым).

Сустрэча працягвалася каля гадзіны. Вітаючы прадстаўнікоў найбольшай памеснай Праваслаўнай Царквы ў свеце, Святы Айцец зазначыў, што шлях адзінства — гэта адзіны надзейны шлях, і выказаў сваю радасць ад кожнай сустрэчы, якая дапамагае жыць верай і ісці разам.

«Я задаволены магчымасцю ісці разам з вамі шляхам адзінства: адзіным шляхам, які абяцае нам штосьці надзейнае, таму што шлях падзелу вядзе нас да войнаў і разбурэння. Я жадаю запэўніць вас, асаблівым чынам цябе, дарагі браце, і ўсіх вас, што Каталіцкі Касцёл ніколі не дапусціць, каб у яго членаў з’яўлялася стаўленне падзелу. Мы ніколі сабе гэтага не дазволім, я гэтага не жадаю», — падкрэсліў Папа.

Насуперак тым, хто ўпарта ўздымае «штандар уніятызму», які «ўжо больш не актуальны», а, па словах Папы, яму самому «нават прычыняе боль», Пантыфік заўважыў, што «ў Маскве і ў Расіі ёсць адзіны Патрыярхат — ваш» і што «ў нас там не будзе іншага».

«Неабходна паважаць Цэрквы, якія знаходзяцца ў адзінстве з Рымам, але уніятызм як шлях да адзінства сёння не падыходзіць. Мяне, наадварот, суцяшае, калі я бачу прыязна працягнутую руку, братнія абдымкі, аднадумства, рух наустрач. Экуменізм адбываецца ў руху. Будзем жа рухацца!» — сцвердзіў пастыр Паўсюднага Касцёла.

Святы Айцец заклікаў рухацца разам, не чакаючы «дактрынальнага пагаднення» па ўсім тым, што яшчэ нас падзяляе, па ўсіх нявырашаных пытаннях, але ісці шляхам дыялогу і малітвы. Пры гэтым ён адзначыў неабходнасць вывучаць тэалогію і высвятляць пазіцыі. На яго думку, неабходна гэтым займацца і адначасова рухацца наперад з любоўю і малітвай.

Папа Францішак узгадаў таксама гістарычную сустрэчу з Патрыярхам Кірылам, якога назваў «братам», зазаначыўшы, што яна стала крокам згоды і прымірэння. На заканчэнне наступнік Пятра звярнуў увагу на дзве важныя рэчы.

Першая — гэта ўзаемапавага і неўмяшальніцтва.

«Каталіцкі Касцёл, Каталіцкія Касцёлы не павінны ўмешвацца ва ўнутраныя справы Рускай Праваслаўнай Царквы, а таксама не павінны лезці ў палітыку. Гэта маё стаўленне, гэта стаўленне Святога Пасаду сёння. Тыя, хто будзе ў гэта ўмешвацца, праявяць непаслухмянасць Святому Пасаду», — перасцярог Папа.

Другая важная рэч, на яго думку, — гэта пабожнасць, якая праяўляецца ў асабістай малітве і ў малітве адных за другіх. Святы Айцец прызнаўся, што ён кожны вечар і кожную раніцу моліцца перад рэліквіямі святога Серафіма Сароўскага, падараванымі яму патрыярхам Кірылам.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Дух хоча жыць у нас –
мы пакліканы да вечнага жыцця