Беларуска Кацярына Адамчык, якая прымае ўдзел у перадсінадальнай сустрэчы ў Ватыкане, паразмаўляла з некаторымі ўдзельнікамі пра становішча хрысціян у іх краінах.
Пра каталіцкую моладзь расказваюць удзельнікі з Лівана, Егіпта і Трынідад і Табага.
Ліван: выбарчы прэзідыум у душпастырстве
Ліванцу Тоні толькі 23 гады, але ў сваім універсітэце ён — прэзідэнт хрысціянскай супольнасці студэнтаў. Такая супольнасць дзейнічае ў кожным з універсітэтаў Лівана.
Гэта выбарчая пасада на год. Акрамя прэзідэнта ёсць і адмысловы прэзідыум, які таксама складаецца са студэнтаў. У абавязкі супольнасці ўваходзіць у тым ліку і душпастырская дзейнасць.
Як у нас арганізоўваюцца пілігрымкі ў Будслаў і Тракелі, у іх — пілігрымкі ў іншыя краіны. За правядзенне пілігрымак якраз і адказвае прэзідэнт супольнасці. Паводле слоў Тоні, перайманне гэтых абавязкаў свецкай моладдзю значна спрашчае служэнне мясцовым святарам.
Егіпет: татуіроўка на запясці хрысціянаў
Хлопец Рані — хрысціянін з Егіпта. Доўгі час мусульмане вельмі варожа ставіліся да прадстаўнікоў любых іншых рэлігій і часта забівалі іх.
Каб абараніць веру, з пэўнага ўзросту кожнаму хрысціяніну ў Егіпце пачалі рабіць татуіроўку на запясці — крыжык.
Татуіроўка як знак бясспрэчнай прыналежнасці да хрысціянства служыць напамінам пра Бога і вызваляе ад спакусы адрачэння ад веры ў моманты небяспекі для жыцця.
Трынідад і Табага: ухіл у душпастырстве — на спорт
Трынідад і Табага — астраўная дзяржава ў Карыбскім моры, паблізу ад узбярэжжа Венесуэлы. Прадстаўляць моладзь гэтай краіны ў Ватыкан прыбыла дзяўчына Хадзін Боўэл.
Раней у Трынідад і Табага каталіцтва лічылася самай распаўсюджанай канфесіяй, але сёння яго выцясняюць новыя пратэстанцкія Цэрквы.
Мясцовы Касцёл сутыкаецца з крызісам пакліканняў, таму асноўны націск у душпастырстве робіцца на фармацыю маладых людзей, каб яны да канца зразумелі сваё сапраўднае пакліканне.
Каля 17 працэнтаў католікаў прыходзіць на Імшу па нядзелях, але большасць — гэта дарослыя людзі, а не моладзь. Канцэрты хрысціянскіх гуртоў і моладзевыя чуванні праводзяцца вельмі рэдка. Асноўны ўхіл мясцовыя душпастыры робяць на ўдзел каталіцкай моладзі ў спартыўных мерапрыемствах.
Паводле слоў Хадзін Боўэл, мясцовыя біскупы адкрытыя да патрэбаў моладзі і даюць ёй слова. Але праблемы часта застаюцца на парафіяльным узроўні, таму моладзь заахвочваюць быць больш актыўнай у парафіях.
Фармацыя моладзі ў Трынідад і Табага праводзіцца толькі ў тых рэгіёнах, дзе арганізавана моладзевая супольнасць або моладзевы цэнтр. У мясцовым Касцёле дзейнічае супольнасць Opus Dei, якая праводзіць рэкалекцыі. Але, на жаль, не ўсе пра іх ведаюць.
