Пошук

07.03.2018 14:25   Паводле: Libreria Editrice Vaticana / Фота: Vatican Media / Пераклад і адаптацыя: Мікола Гракаў / Catholic.by

Эўхарыстычная малітва вучыць нас, «каб мы заўсёды і ўсюды складалі падзяку» нашага жыцця, ператваралі яго ў свабодны, бескарыслівы дар любові і ўтваралі еднасць Касцёла.

Пра гэта казаў папа Францішак на катэхезе падчас агульнай аўдыенцыі 7 сакавіка, якая сабрала каля 11 тысяч слухачоў і стала працягам яго катэхезаў на тэму святой Імшы.

Эўхарыстычная малітва адлюстроўвае тое, што зрабіў Езус, калі быў за сталом разам са сваімі вучнямі падчас Апошняй Вячэры і «складаў падзяку» над хлебам, а потым — над келіхам з віном (гл. Мц 26, 27; Мк 14, 23; Лк 22, 17. 19; 1 Кар 11, 24).

«Яго падзяка нанава перажываецца ў кожнай нашай Эўхарыстыі, яднаючы нас з Яго ахвярай збаўлення».

У гэтай урачыстай малітве Касцёл паказвае, што ён здзяйсняе ў Эўхарыстыі, а таксама тое, чаму ён гэта робіць: дзеля ўсталявання еднасці-камуніі з Хрыстом, які сапраўды прысутнічае ў кансэкраваных постацях хлеба і віна.

Каб з’яднацца, неабходна разумець. Таму Касцёл пажадаў, каб святая Імша цэлебравалася на мове, зразумелай для людзей, якія яднаюцца ў супольным праслаўленні, у гэтай прыгожай малітве разам са святаром.

Распачынаецца Эўхарыстычная малітва з прэфацыі, якая з’яўляецца падзякай Богу за ўсе Ягоныя дары, асабліва за спасланне Сына — Збаўцы свету. Прэфацыя завяршаецца словамі «Святы, святы, святы…» і можа спявацца, каб такім чынам падкрэсліць, што супольнасць вернікаў у гэты момант злучае свае галасы з хваласпевам Анёлаў і святых, якія праслаўляюць Бога.

Пасля гэтага гучыць заклік да Святога Духа, каб Ён сваёю моцаю перамяніў хлеб і віно ў Цела і Кроў Хрыста. Дзеянне Духа Святога і дзейснасць словаў Хрыста, якія прамаўляе святар, забяспечваюць рэальную прысутнасць у Эўхарыстыі Хрыста і Яго збаўчай ахвяры. Гэта і ёсць тая «вялікая таямніца нашай веры», якую вернікі вызнаюць пасля кансэкрацыі. Касцёл як таямніца еднасці-камуніі ў малітве яднаецца з ахвярай Хрыста.

«Ідучы на святую Імшу, мы ідзем туды для таго, каб увасобіць сабою Касцёл у малітве. Падобна да Хрыста, які працягнуў свае рукі на крыжы, Касцёл ахвяруе сябе і заступаецца за ўсіх людзей праз Яго, з Ім і ў Ім».

Эўхарыстычная малітва — гэта просьба да Бога з’яднаць усіх сваіх дзяцей у дасканалай любові, у еднасці з Папам і біскупам, якія называюцца па імені на знак таго, што Эўхарыстыя здзяйсняецца ў еднасці з паўсюдным і мясцовым Касцёлам. Эўхарыстычная малітва і ахвяра прыносіцца Богу за ўсіх членаў Касцёла — жывых і памерлых — у чаканні благаслаўлёнай надзеі і ўдзелу ў вечнай спадчыне Нябеснага Валадарства разам з Паннай Марыяй і ўсімі святымі.

«У Эўхарыстычнай малітве ніхто не забыты і нішто не забыта, але ўсё даручаецца Богу, і калі я сам або мае родныя маюць нейкую патрэбу або ўжо перайшлі з гэтага свету на той, я магу пра гэта ўзгадаць або пра сябе, або запісаўшы імя, каб яно было прачытана.

Колькі за гэта трэба заплаціць? Ніколькі, бо за святую Імшу не плацяць! Святая Імша — гэта ахвяра Хрыста, дадзеная Ім задарма.

Адкупленне дадзена задарма. Калі жадаеш даць ахвяру — зрабі гэта, але за святую Імшу не плацяць. Важна гэта разумець».

Форма эўхарыстычнай малітвы адлюстроўвае ўсё тое, што адбываецца падчас Эўхарыстыі, і чым лепш мы яе разумеем, тым больш свядома ў ёй удзельнічаем. Яна таксама вучыць нас тром рэчам: заўсёды дзякаваць (а не толькі тады, калі ў нас усё добра), ператварыць сваё жыццё ў свабодны і бескарыслівы дар любові, а таксама будаваць канкрэтную еднасць-камунію ў Касцёле і з усімі людзьмі.

Такім чынам, цэнтральная малітва святой Імшы паступова нас выхоўвае, каб мы ператварылі сваё жыццё ў Эўхарыстыю — у падзяку.

Абноўлена 07.03.2018 16:10
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця