2 лютага, у свята Ахвяравання Пана і дзень кансэкраванага жыцця, біскупы з Беларусі, якія знаходзяцца ў Рыме з візітам ad limina Apostolorum, наведалі наступныя дыкастэрыі — ведамствы Святога Пасаду: Кангрэгацыю па справах Інстытутаў кансэкраванага жыцця і Таварыстваў апостальскага жыцця і Кангрэгацыю Каталіцкай Адукацыі, а ўвечары канцэлебравалі святую Імшу з папам Францішкам.
У Кангрэгацыі па справах Інстытутаў кансэкраванага жыцця і Таварыстваў апостальскага жыцця сітуацыю ў Беларусі ў гэтай сферы прадставіў біскуп Аляксандр Яшэўскі, салезіянін.
Ён як адказны ў ККББ за пастырства Інстытутаў кансэкраванага жыцця і Таварыстваў апостальскага жыцця назваў кансэкраваных асобаў «хуткай дапамогай Касцёлу». Гэта асабліва адчувалася 25 гадоў таму, калі Касцёл у Беларусі толькі пачынаў адраджацца пасля перыяду ганенняў, якія закранулі тры пакаленні.
Біскуп Яшэўскі распавёў пра дасягненні і праблемы кансэкраванага жыцця ў Беларусі. Галоўнымі праблемамі з’яўляюцца складанасці, звязаныя з рэгістрацыяй манаскіх супольнасяў, манаскай фармацыяй і змяншэннем колькасці пакліканняў да кансэкраванага жыцця.
Кангрэгацыя высока ацаніла ўнёсак прадстаўнікоў розных харызмаў кансэкравангага жыцця як у адраджэнні, так і ва ўмацаванні Касцёла ў Беларусі.
Кіраўніцтва кангрэгацыі таксама звярнула ўвагу на неабходнасць арганізацыі прынамсі пачатковай фармацыі на тэрыторыі Беларусі, а не за мяжой, наколькі гэта магчыма ў мясцовых рэаліях. Вырашэнню гэтай праблемы магло б спрыяць стварэнне адзінага цэнтра фармацыі для некалькіх супольнасцяў кансэкраванага жыцця.
У той самы дзень біскупы наведалі Кангрэгацыю Каталіцкай Адукацыі.
Даклад аб сітуацыі з рэлігійным навучаннем у Беларусі зрабіў Мітрапаліт Мінска-Магілёўскі арцыбіскуп Тадэвуш Кандрусевіч, які звярнуў увагу на тое, што беларускае заканадаўства не дазваляе вывучаць рэлігію ў школах і ўніверсітэтах, а таму адзіным месцам яе вывучэння для большасці дзяцей і моладзі становяцца парафіі. Адсутнасць адпаведнага пагаднення паміж Святым Пасадам і Рэспублікай Беларусь з’яўляецца тормазам у вырашэнні гэтай праблемы.
Арцыбіскуп Кандрусевіч таксама праінфармаваў кіраўніцтва кангрэгацыі аб тым, што цяпер рыхтуецца пагадненне паміж ККББ і дзяржавай, падпісанне якога можа дапамагчы частковаму вырашэнню некаторых праблем у галіне каталіцкай адукацыі ў Беларусі.
З мясцовых дасягненняў у сферы касцёльнай адукацыі была адзначана дзейнасць Каледжа каталіцкай тэалогіі імя св. Яна Хрысціцеля ў Мінску, Катэхетычнага каледжа імя Зыгмунта Лазінскага ў Баранавічах і Катэхетычнага інстытута ў Гродне, курсаў па вывучэнні Святога Пісання пры парафіях, а таксама план заснавання Тэалагічнай акадэміі імя св. Яна Паўла II.
Кангрэгацыя высока ацаніла дзейнасць Касцёла ў галіне хрысціянскай адукацыі, нягледзячы на праблемы і цяжкасці, якія існуюць у гэтай сферы. Ватыканскія спецыялісты ў галіне адукацыі рэкамендавалі больш увагі звярнуць на падрыхтоўку свецкіх лідараў з інтэлігэнцыі з дапамогай арганізацыі летніх курсаў пры існуючых навучальных установах.
Рэлігійная адукацыя павінна адпавядаць выклікам часу і ўлічваць сацыяльнае вучэнне Касцёла. Асаблівую ўвагу неабходна звярнуць на падрыхтоўку выкладчыцкіх кадраў для семінарый і іншых навучальных устаноў. Выдадзеная нядаўна папам Францішкам Апостальская канстытуцыя Veritatis gaudium, прысвечаная каталіцкай адукацыі, прадпісвае на працягу двух гадоў прывесці праграмы навучання ў адпаведнасць з новымі нормамі і ўсталяваць філіяльныя сувязі з папскімі навучальнымі ўстановамі.
Увечары біскупы з Беларусі канцэлебравалі з папам Францішкам святую Імшу ў базыліцы св. Пятра, дзе ў гэты дзень асабліва маліліся за кансэкраваных асобаў, а пасля Імшы наведалі духоўны цэнтр супольнасці Sant’Egidio, вядомай сваімі экуменічнымі ініцыятывамі і працай з патрабуючымі і мігрантамі.
