Вырасці з пабожнасці «па звычцы» і навучыцца «пражываць сустрэчу» з Езусам у малітве заклікаў папа Францішак 14 студзеня падчас малітвы «Анёл Панскі» на плошчы святога Пятра.
Каментуючы ўрывак з Евангелля, які заклікае да адкрыцця Хрыста, Святы Айцец звярнуў увагу на пакліканне чалавека ісці за Тым, «каго мы сузіралі ў таямніцы Божага Нараджэння».
«У гэтым пошуку асноўную ролю адыгрывае сапраўдны сведка: асоба, якая першая прайшла гэты шлях і сустрэлася з Панам.
У Евангеллі такі сведка — гэта Ян Хрысціцель. Таму ён можа скіраваць вучняў да Езуса, які ўводзіць іх у новы вопыт, кажучы: «Ідзіце і ўбачыце» (пар. Ян 1, 39).
Мы можам мець вопыт розных рэчаў, займацца многімі справамі, падтрымліваць адносіны з многімі людзьмі, але толькі сустрэча з Хрыстом у час, вядомы Богу, можа надаць нашаму жыццю поўны сэнс і зрабіць плённымі нашыя планы і нашыя пачынанні».
Як дадаў Пантыфік, «недастаткова скласці для сябе вобраз Бога з чужых словаў; трэба выйсці на пошукі Боскага Настаўніка і пайсці туды, дзе Ён жыве».
Пытанне, з якім вучні звярнуліся да Езуса: «Дзе жывеш?» (пар. Ян 1, 38) — мае глыбокі духоўны сэнс: яно выражае жаданне даведацца, дзе жыве Настаўнік, каб магчы застацца з Ім.
Жыццё веры заключаецца ў жаданні быць з Панам, а гэта значыць — у няспынным пошуку таго месца, дзе Ён жыве.
«Гэта азначае, што мы пакліканыя вырасці з пабожнасці „па звычцы“ і „з прымусу“, перажываючы сустрэчу з Езусам у малітве, у разважанні над Божым словам і ва ўдзеле ў сакрамэнтах, каб быць з Ім і прыносіць плён дзякуючы Яму, з Яго дапамогай, з Яго ласкі.
Шукаць Езуса, сустрэцца з Езусам, ісці за Езусам: такі гэты шлях. Шукаць Езуса, сустрэцца з Езусам, ісці за Езусам.
Няхай Найсвяцейшая Панна Марыя падтрымлівае нас у намеры ісці за Езусам, пайсці туды і застацца там, дзе Ён жыве, каб слухаць Яго слова жыцця, каб з’яднацца з Тым, хто бярэ на сябе грахі свету, каб у Ім зноў адшукаць надзею і моц духу», — заключыў Святы Айцец.
