Падчас агульнай аўдыенцыі, якая адбылася ў сераду 11 снежня ў ватыканскай зале Паўла VI, Папа Францішак нагадаў пра значэнне Раратніх Імшаў, якія цэлебруюцца на ўшанаванне Панны Марыі падчас Адвэнту і з даўніх часоў з’яўляюцца традыцыйнымі на нашых землях.
Як паведаміла Польская рэдакцыя парталу Vatican News, у агульнай папскай аўдыенцыі ў Ватыкане ўдзельнічала група студэнтаў Люблінскага каталіцкага ўніверсітэта, у якім вучылася і вучыцца таксама нямала нашых суайчыннікаў: святароў, кансэкраваных асобаў і свецкіх.
Вітаючы пілігрымаў з Польшчы, Святы Айцец, між іншым, заўважыў: «Традыцыя адвэнтавых Імшаў у вашай краіне жывая.
Няхай глыбокая сімволіка гэтай літургіі, а таксама багатыя на змест адвэнтавыя спевы дапамогуць вам узносіць да Бога гэтую старажытную малітву Касцёла: „Марана та — Прыйдзі, Пане!“ Благаслаўляю вас ад усяго сэрца», — сказаў Папа Францішак.
