«Будучыняй М’янмы павінен быць мір, збудаваны на павазе да годнасці і правоў кожнага члена грамадства, на павазе да кожнай этнічнай групы і яе тоеснасці, на павазе да закону і дэмакратычнага ладу», — сказаў папа Францішак у звароце да дзяржаўных уладаў, прадстаўнікоў грамадзянскай супольнасці і дыпламатычнага корпуса М'янмы. Сустрэча прайшла 28 лістапада ў Міжнародным кангрэс-цэнтры ў Найп’іда.
Святы Айцец заўважыў, што самым вялікім багаццем М’янмы з’яўляецца яе народ, які шмат пакутаваў і працягвае цярпець па прычыне працяглых ўнутраных канфліктаў і варожасці, што пасеялі глыбокія падзелы. «Лячэнне ран з’яўляецца фундаментальным палітычным і духоўным прыярытэтам», — падкрэсліў Пантыфік.
Папа падтрымаў намаганні ўладаў па аднаўленні міру і дадаў, што згода магчыма толькі на базе справядлівасці і павагі да правоў чалавека. У гэтым кантэксце адмысловую ролю адыгрываюць рэлігіі, якія павінны «дапамагчы пераадолець прычыны канфліктаў, будаваць масты дыялогу, шукаць справядлівасці і быць прароцкім голасам пакутуючых».
Пантыфік пажадаў, каб грамадскія адметнасці былі не прычынай канфліктаў, а сілай для дасягнення адзінства, прабачэння, талерантнасці і мудрага будавання краіны. Святы Айцец заклікаў прадстаўнікоў розных веравызнанняў супрацоўнічаць у дапамозе бедным і навучанні сапраўдным рэлігійным і чалавечым каштоўнасцям.
Звяртаючыся да каталіцкай супольнасці М’янмы, Пантыфік адзначыў важнасць яе ўдзелу ў працы на карысць супольнага дабра праз дабрачынныя і гуманітарныя ініцыятывы ў супрацоўніцтве з вызнаўцамі іншых рэлігій і ўсімі людзьмі добрай волі, «каб адкрыць новую эру згоды і прагрэсу».
Пасля сустрэчы з палітыкамі і грамадскімі дзеячамі Святы Айцец накіраваўся ў аэрапорт, адкуль выляцеў у кірунку Янгона. Там, у сядзібе мясцовага арцыбіскупа, знаходзіцца яго часовая рэзідэнцыя.
