У Ватыкане і Рыме праходзіць XVI Міжнародны фестываль сакральнай музыкі і мастацтва, прымеркаваны сёлета да 100-годдзя аб’яўленняў Маці Божай у Фаціме.
Пачаўся фестываль урачыстай Эўхарыстыяй у базыліцы св. Пятра, якую ўзначаліў кардынал Анджэло Камастры, арцыпрэзбітэр базылікі і генеральны вікарый Яго Святасці для Дзяржавы Ватыкан. «Будзем адносіцца да Евангелля з усёй сур’ёзнасцю, будзем вернымі яму, без страху, як прасіла Марыя падчас сваіх аб’яўленняў», — заклікаў іерарх музыкантаў у сваёй гаміліі.
Падчас літургіі прагучала каранацыйная Імша Вольфганга Амадэя Моцарта ў выкананні японскага філарманічнага аркестра і хору Illuminart пад кіраўніцтвам дырыжора Тамамі Нішымота, а на яе заканчэнне — старажытная японская хрысціянская малітва Orasho, напісаная ў перыяд евангелізацыі Японіі на аснове грыгарыянскага спеву.
«Я моцна веру, што музыка можа наблізіць да Бога, і, выконваючы яе, адчуваю сябе бліжэй да Яго. Бога нельга ўбачыць, але з дапамогай музыкі можна адчуць Яго прысутнасць», — падзялілася Тамамі Нішымота ў каментарыі для Ватыканскага радыё.
Фестываль працягнецца да 10 лістапада 2017 г. У ім прымаюць удзел музыкальныя калектывы з Германіі, Аўстрыі, Расіі, Італіі і хор ватыканскай базылікі св. Пятра. Прадугледжаны іх выступленні ў розных касцёлах Рыма.
