Рымская дэкларацыя, адобраная ўдзельнікамі Канферэнцыі па пытаннях годнасці непаўналетніх, уяўляе сабою настойлівы заклік да абароны дзяцей у лічбавых СМІ.
«У эпоху інтэрнэта, — гаворыцца ў дакуменце, прадстаўленым 6 кастрычніка папам Францішкам, — свет сутыкаецца з беспрэцэдэнтнымі праблемамі, якія неабходна вырашыць, каб абараніць правы і годнасць дзяцей і захаваць іх ад злоўжыванняў і эксплуатацыі».
Вырашэнне гэтых праблем «патрабуе новага мыслення і новых падыходаў, больш высокага ўзроўню глабальнай дасведчанасці і натхнёнага лідарства». Таму Рымская дэкларацыя з’яўляецца «заклікам да ўсіх абараніць годнасць дзяцей».
У дакуменце скіраваны заклік да ўладаў свету «правесці глабальныя інфармацыйна-асветніцкія кампаніі для інфармавання людзей пра сур’ёзнасць і маштабы жорсткіх адносін і эксплуатацыі дзяцей ва ўсім свеце».
Так жа моцна гучыць заклік да «іерархаў вялікіх рэлігій свету»: інфармаваць і мабілізаваць сваіх веруючых, каб яны далучыліся да глабальнага руху па абароне дзяцей у свеце.
Рымская дэкларацыя заклікае «парламенты ўсяго свету» паклапаціцца пра ўдасканаленне «заканадаўства для больш эфектыўнай абароны непаўналетніх і прыцягванне да адказнасці тых, хто чыніць насілле ў адносінах да дзяцей і эксплуатуе іх».
Важна, каб «кіраўнікі тэхналагічных кампаній забяспечылі распрацоўку і ўвядзенне новых інструментаў і тэхналогій, каб супрацьстаяць распаўсюджванню выяваў сексуальнага насілля ў інтэрнэце і спыняць распаўсюджванне выяваў непаўналетніх, якія ідэнтыфікуюцца як ахвяры».
У дакуменце таксама гаворыцца пра неабходнасць абароны непаўналетніх ад няўрадавых арганізацый, медыцынскіх установаў, ад усіх кампанентаў грамадзянскага грамадства.
Удзельнікі канферэнцыі Child Dignity заклікаюць праваахоўныя арганізацыі свету «пашырыць рэгіянальнае і глабальнае супрацоўніцтва з мэтай паляпшэння абмену інфармацыяй у ходзе расследаванняў, а таксама актывізаваць сучасныя намаганні па барацьбе з гэтымі злачынствамі супраць дзяцей, якія перакрочваюць нацыянальныя межы».
