Падчас пералёту з Картахены ў Рым папа Францішак на борце самалёта ў размове з журналістамі назваў калумбійцаў шляхетным народам, які не баіцца выражаць і паказваць тое, што адчувае.
Гэтымі словамі Пантыфік распачаў традыцыйную прэс-канферэнцыю ў самалёце на заканчэнне свайго Апостальскага падарожжа ў Калумбію, адказваючы на пытанні на працягу амаль 40 хвілін.
Першыя пытанні датычылі сітуацыі ў Калумбіі, падзеленай на прыхільнікаў і праціўнікаў мірнай дамовы, заключанай паміж уладамі і паўстанцамі. Святы Айцец назваў партызанскую вайну «хваробай», якая пасеяла шмат нянавісці ў сэрцах людзей.
«Я заўважыў жаданне ісці наперад, якое выходзіць за рамкі трываючых перамоваў», — сказаў Пантыфік. На яго погляд, калумбійцы прагнуць міру і трэба дапамагчы ім блізкасцю і малітвай. Затым папа Францішак заўважыў, што мірны працэс будзе больш эфектыўным, калі яго возьме ў свае рукі народ, а не толькі будуць весціся перамовы на ўзроўні палітыкаў, тэхнічных выканаўцаў і ААН.
У сувязі з ураганам, які абрынуўся на астравы Карыбскага мора і паўднёвую частку ЗША, гаворка ішла аб уплыве чалавека на кліматычныя змены. Папа нагадаў пра маральную адказнасць усіх за тое, што адбываецца з планетай, уключаючы палітыкаў. Навукоўцы ясна гавораць пра чалавечы фактар, і трэба адносіцца да гэтай праблемы сур’ёзна, лічыць Пантыфік.
