У інтэрв'ю, якое 18 мая было апублікавана манахамі аўгустынцамі, асабісты сакратар Папы Льва XIV распавядае пра малітоўнае жыццё Святога Айца і пра яго стыль кіравання.
Папа праводзіць свой дзень, засяроджваючыся на малітве, цішыні і пошуку Бога сярод сваіх абавязкаў на чале Касцёла, сказаў яго асабісты сакратар, перуанскі святар айцец Эдгард Рымайкуна.
Айцец Рымайкуна ахарактарызаваў Пантыфіка як чалавека, які «заўсёды жыве ў пастаяннай прысутнасці Бога».
«З самай раніцы і на працягу ўсяго дня ў яго ёсць вызначаны час для малітвы, уключаючы святую Імшу і чытанне Літургіі гадзін; таксама мы молімся Ружанец», — растлумачыў святар.
Асабісты сакратар Папы дадаў, што Леў XIV на працягу дня «заўсёды шукае кантакту з Богам у цішыні і малітве перад Найсвяцейшым Сакрамэнтам у капліцы».
Паводле слоў айца Рымайкуны, духоўнасць Пантыфіка знаходзіцца пад глыбокім уплывам думак святога Аўгустына. «Святы Аўгустын казаў: “Бог настолькі цесна звязаны з чалавекам, што сам чалавек знаходзіцца ўнутры самога сябе”», — адзначыў ён.
«Святы Айцец шукае Бога ўнутры сябе; ён размаўляе з Ім, гэта і ёсць малітва», — дадаў ён.
Духоўнасць, якая прыводзіць да блізкасці
Перуанскі святар сказаў, што духоўны вопыт Папы затым адлюстроўваецца ў ягоным узаемадзеянні з «людзьмі, з якімі ён працуе».
Гэтая блізкасць, адзначыў ён, праяўляецца ў «часе, які ён прысвячае кожнаму чалавеку, які да яго звяртаецца», і ва ўвазе, якую ён надае тым, хто давярае яму свае цяжкасці ці клопаты.
«Калі хтосьці давярае яму канкрэтную інтэнцыю або праблему, ён заўсёды пра гэта памятае»,
— дадаў сакратар.
Папа, які слухае, перш чым прыняць рашэнне
Айцец Рымайкуна таксама ахарактарызаваў Льва XIV як цярплівага і разважлівага чалавека ў кіраванні Касцёлам. «Ён не з'яўляецца чалавекам імгненных рашэнняў. Ён заўсёды думае, слухае і ўлічвае нават супрацьлеглыя погляды», — заявіў памочнік Папы.
Сакратар падкрэсліў, што Пантыфік імкнецца пазбегнуць канфрантацыі і спрыяць адзінству.
«Ён чалавек, які імкнецца будаваць масты, імкнецца да дыялогу і заўсёды пазбягае супрацьстаяння», — дадаў перуанскі святар.
Мір: пастаянны клопат
Папскі сакратар таксама адзначыў, што адной з найвялікшых крыніц пакут Святога Айца з'яўляюцца цяперашнія войны. «Ён шмат пакутуе з-за ўсяго гэтага», — сказаў айцец Эдгард і адзначыў, што першымі словамі Льва XIV пасля абрання Папам быў заклік да міру: «Спакой вам» (пар. Ян 20,19; Лк 24,36).
«Ён заўсёды працуе дзеля міру; ён пастаянна заклікае ўлады да спынення агню», — адзначыў айцец Рымайкуна.
Папа заўсёды будзе мець патрэбу ў нашых малітвах
Айцец Рымайкуна заклікаў вернікаў пастаянна маліцца за Святога Айца, улічваючы цяжар духоўнай адказнасці, які Папа нясе, кіруючы Паўсюдным Касцёлам.
«Нашых малітваў ніколі не бывае занадта шмат. Святы Айцец заўсёды будзе мець у іх патрэбу»,
— падкрэсліў ён.
