Як падае Беларуская служба Vatican News, кіраўнік Залы Друку Святога Пасада Матэа Бруні ў афіцыйнай заяве паведаміў аб планах на першае апостальскае падарожжа ў пантыфікаце Льва XIV.
Пантыфік прыняў запрашэнні ад кіраўнікоў дзяржаў і касцёльных улад абедзвюх краін.
Першым этапам падарожжа стане Турцыя, дзе Папа будзе знаходзіцца з 27 па 30 лістапада. Адразу пасля гэтага, з 30 лістапада па 2 снежня, адбудзецца візіт у Ліван.
Асаблівае значэнне турэцкай частцы падарожжа надае пілігрымка ў Ізнік. Гэты візіт прымеркаваны да святкавання 1700-годдзя Нікейскага Сабору, які адбыўся ў 325 годзе ў старажытнай Нікеі, на месцы сучаснага Ізніка. Гэты Сабор з'яўляецца адной з найважнейшых падзей у гісторыі хрысціянства.
Пасля завяршэння візіту ў Турцыі Пантыфік накіруецца ў Ліван, адказваючы на асобнае запрашэнне ад кіраўніцтва і іерархаў гэтай блізкаўсходняй краіны.
