У пасланні на XXXIII Сусветны дзень хворых, які Касцёл адзначыць 11 лютага, у літургічны ўспамін Маці Божай з Люрда, Папа Францішак разважае пра надзею, якая ўмацоўвае ў выпрабаваннях і заклікае да салідарнасці з тымі, хто пакутуе.
Як адзначае Беларуская рэдакцыя парталу Vatican News, сёлета менавіта тэма надзеі набывае асаблівае значэнне ў кантэксце Юбілейнага года, калі Касцёл заклікае вернікаў стаць «пілігрымамі надзеі».
У сваім пасланні Пантыфік засяроджваецца на словах святога Паўла «Надзея не асароміць» (Рым 5, 5), падкрэсліваючы, што менавіта надзея робіць нас моцнымі ў выпрабаваннях. Папа Францішак разважае над пытаннямі, якія часта ўзнікаюць у хворых: як заставацца моцнымі, калі нас закранаюць сур’ёзныя хваробы, лячэнне якіх часта перавышае нашыя магчымасці?
Святы Айцец падкрэслівае, што ў момант хваробы чалавек адкрывае не толькі сваю слабасць, але і прысутнасць Бога.
«У час хваробы мы спазнаём блізкасць і спагаду Бога, які ў Езусе падзяліў нашыя пакуты. Ён не пакідае нас і часта здзіўляе дарам стойкасці, якой мы ніколі не чакалі ад сябе», — піша пастыр паўсюднага Касцёла.
Папа Францішак звяртае асаблівую ўвагу на значэнне салідарнасці ў месцах, дзе знаходзяцца хворыя. «У бальніцах і клініках мы становімся анёламі надзеі, пасланцамі Бога адзін для аднаго, усе разам: хворыя, урачы, медсёстры, сваякі, сябры, святары, манаскія асобы», — падкрэслівае Святы Айцец.
Папа заахвочвае захоўваць у памяці ўсе моманты дабрыні і спагады, якія адбываюцца ў месцах пакуты:
«Важна ўмець заўважаць прыгажосць гэтых сустрэч ласкі і вучыцца запісваць іх у душы, каб не забыць: захоўваць у сэрцы ласкавую ўсмешку медработніка, удзячны і давяральны позірк пацыента, разумеючы і клапатлівы твар доктара ці валанцёра», — заўважае Пантыфік.
На заканчэнне свайго паслання Папа Францішак звяртаецца да Маці Божай, якая ўшаноўваецца пад тытулам Аздараўлення хворых, з малітвай «Тваёй абароне», просячы Яе заступніцтва за ўсіх хворых і тых, хто пра іх клапоціцца. Папа таксама просіць малітвы за яго самога.
Сусветны дзень хворых быў устаноўлены святым Янам Паўлам II у 1992 годзе і з тых часоў штогод становіцца нагодай для асаблівай увагі да праблем хворых і медыцынскіх работнікаў ва ўсім свеце.
