24 верасня ў Ватыкане прадставілі лагатып і дэвіз Сусветных дзён моладзі, якія пройдуць у 2027 годзе ў Сеуле. Цэнтральным элементам стаў крыж перамогі Езуса над светам.
Як паведаміла Беларуская рэдакцыя парталу Vatican News, афіцыйная прэзентацыя адбылася падчас прэс-канферэнцыі, на якой было падкрэслена, што лагатып цесна звязаны з дэвізам сустрэчы: «Будзьце адважнымі! Я перамог свет (Ян 16, 33)» і адлюстроўвае яе галоўную тэму.
Крыж Перамогі Езуса — сімвал надзеі і веры моладзі
У цэнтры лагатыпа размешчаны чырвона-сіні крыж, які сімвалізуе крыж перамогі Езуса над светам.
Чырвоная лінія, якая падымаецца ўверх, азначае Стварыцеля на небе, у той час як сіняя лінія сімвалізуе зямлю. Разам яны ўтвараюць крыж, які ўвасабляе выкананне Божай волі на зямлі.
«Малады чалавек, гатовы несці свой крыж за Езусам»
За крыжам знаходзіцца жоўтае кола, якое сімвалізуе Духа Святога і адлюстроўвае славу Уваскрослага Хрыста, нашае святло і надзею. Цікавым элементам з’яўляецца выкарыстанне карэйскага алфавіта (хангыль) для напісання слова Сеул у традыцыйнай карэйскай каліграфіі. Літары адначасова складаюцца ў абрэвіятуру WYD (World Youth Day — Сусветныя дні моладзі, англ.).
Арганізатары тлумачаць, што лагатып у цэлым адлюстроўвае маладога чалавека, гатовага несці свой крыж за Езусам.
Яго характарызуе моцная, дынамічная вера, якая дазваляе смела выцягнуць рукі да крыжа і ўстаць на ногі, каб выконваць Божую волю ў гэтым свеце.
«Традыцыйныя колеры Карэі — адлюстраванне духу і энергіі моладзі»
У лагатыпе гарманічна выкарыстаны традыцыйныя колеры Карэі.
Чырвоны сімвалізуе пакутніцкі дух продкаў, сіні — энергію маладых людзей. Чорны колер азначае няпэўны час будучыні перад маладымі людзьмі, а жоўты сімвалізуе славу Духа Святога і перамогу Хрыста, якая будзе дадзена моладзі.
Варта адзначыць, што па жаданні Папы Францішка натхненнем для стварэння лагатыпа СДМ у Сеуле стала карціна «Пасля дажджу на гары Інвансан» мастака Чон Сона (1676–1759), творчасць якога з’яўляецца ўнікальным прыкладам карэйскай культуры.
Такім чынам, лагатып СДМ 2027 года не толькі адлюстроўвае духоўныя аспекты сустрэчы, але і падкрэслівае культурную спадчыну Паўднёвай Карэі, спалучаючы традыцыі і сучаснасць у адзіным сімвале.
