8 снежня ў каланадзе плошчы святога Пятра ў Ватыкане прадставяць больш за сотню батлеек. Экспазіцыя прымеркавана да 800-годдзя першых калядных ясляў, аўтарам ідэі якіх лічыцца святы Францішак Асізскі.
Пра гэта паведамляе Беларуская рэдакцыя парталу Vatican News.
Лейтматывам выставы стане святкаванне з'яўлення першай батлейкі у італьянскім мястэчку Грэча: сёлета традыцыі калядных ясляў спаўняецца 800 гадоў.
Лічыцца, што ў мясцовай пячоры святы Францішак Асізскі ва ўспамін нараджэння Езуса ў Бэтлееме падрыхтаваў першую жывую батлейку і такім чынам распачаў прыгожую шматгадовую традыцыю.
Менавіта на ўзор гэтай першай каляднай сцэны сёлета пабудаваны вялікія святочныя яслі на плошчы святога Пятра.
На выставе ў каланадзе вакол ватыканскай плошчы будзе прадстаўлена больш за 120 калядных сцэн з 22 краін свету.
Іх выраблялі з розных матэрыялаў, уключаючы тканіну і дрэва. Сярод іх, напрыклад, калядныя батлейкі ў форме кававаркі і турынскай катэдры, дзве кампазіцыі, зробленыя вязнямі.
Як і ў мінулыя гады, на выставе таксама будуць яслі Божага Нараджэння, створаныя вучнямі школ рэгіёна Лацыё (Італія).
Міжнародная выстава батлеек будзе працаваць да 7 студзеня 2024 года. Наведаць яе можна бясплатна.
