У ноч Нараджэння Пана святую Імшу пастэрку ў катэдральнай базыліцы святога Францішка Ксавэрыя ў Гродне цэлебраваў біскуп Гродзенскі Аляксандр Кашкевіч.
Як паведаміла Прэс-служба Гродзенскай дыяцэзіі, разам з іерархам Эўхарыстыю канцэлебравалі пробашч парафіі ксёндз канонік Ян Кучынскі i яго супрацоўнікі.
На літургіі прысутнічалі прадстаўнікі Праваслаўнай Царквы і Евангелічна-Лютэранскай Царквы.
У катэдры, маці касцёлаў Гродзенскай дыяцэзіі, сабраліся шматлікія парафіяне i жыхары горада.
Як адзначыў біскуп Аляксандр Кашкевіч у гаміліі, ноч Нараджэння Пана «не настройвае на сон, а абуджае, заклікае, ажыўляе, мабілізуе».
Іерарх падкрэсліў, што таямніца Божага Нараджэння — «аб’яўленне праўды пра Бога ласкавага і міласэрнага».
«Праўдзівы Бог становіцца праўдзівым Чалавекам — адным з нас, каб вывесці нас з цемры зла і граху да святла Божай ласкі і сапраўднай свабоды. Ён прыходзіць, каб раз і назаўсёды змяніць лёс гэтага свету, замяніць блытаніну і дысгармонію, якія ў ім пануюць з-за слабага, грэшнага чалавека, праўдзівай боскай прыгажосцю, мірам і парадкам»,
— навучаў біскуп.
Пастыр Касцёла на Гродзеншчыне адзначыў, што «чалавечыя сэрцы сумуюць па любові і толькі па ёй».
«Пан Бог хоча гэты сум заспакоіць, таму выбраў менавіта такі спосаб увайсці ў наша жыццё: ціхі, далікатны і стрыманы. Ён стаў Эмануэлем — Богам з намі — і пасяліўся сярод нас. Так звычайна, так проста, так прыгожа», — дадаў іерарх.
Біскуп заахвоціў усіх прысутных затрымацца пасля заканчэння святой Імшы на хвіліну перад яслямі Збаўцы.
«Падзякуем Яму за тое, што прыйшоў у свет, каб адарыць нас сваёй бясконцай любоўю. A таксама папросім Дзіцятку Езуса, каб цуд Яго Нараджэння здзейсніўся ў кожнай сям’і і кожным чалавечым сэрцы»,
— заклікаў іерарх.
Напрыканцы Літургіі біскуп сардэчна павіншаваў вернікаў. Ён пажадаў ім вясёлых і спакойных святаў; пажадаў, каб нованароджаны Божы Сын падтрымліваў і ўмацоўваў іх у вырашэнні жыццёвых задач і выкананні абавязкаў, атачаў сваёй апекай і супакоем у новым годзе.
