Увечары 18 мая на тэрыторыю Дзяржавы Ватыкан без дазволу прарваўся аўтамабіль, за рулём якога знаходзіўся 40-гадовы мужчына ў цяжкім псіхафізічным стане. Кіроўца затрыманы.
Як паведаміла Беларуская рэдакцыя парталу Vatican News, аўтамабіль, які рухаўся на вялікай хуткасці, прарваўся ў Ватыкан праз уваход святой Ганны, дзе месцяцца кантрольныя пасты Папскай швейцарскай гвардыі і ватыканскай жандармерыі. Нягледзячы на ўказанні швейцарскіх гвардзейцаў, якія перапынілі яму доступ, паколькі кіроўца не меў адпаведных дазволаў, ён ненадоўга выехаў за браму, каб здзейсніць манеўр, вярнуцца і на вялікай хуткасці прарвацца праз пасты.
Спрабуючы спыніць аўтамабіль, інспектар жандармерыі страляў з пісталета па пярэдніх колах машыны, трапіўшы ў яе, але машына ўсё роўна працягнула рух.
Быў хутка перададзены сігнал трывогі, ахоўнікі зачынілі брамы, якія вядуць у заднюю частку базілікі святога Пятра, Ватыканскія сады і на плошчу святой Марты. Кіроўцы ўдалося даехаць да падворку святога Дамаса каля Апостальскага палаца. Тут ён самастойна выйшаў з машыны і быў затрыманы супрацоўнікамі праваахоўных органаў.
«Мужчыну ва ўзросце каля 40-а гадоў неадкладна агледзелі медыкі Упраўлення аховы здароўя і гігіены Дзяржавы Ватыкан, якія канстатавалі сур’ёзны стан псіхафізічных змен. У цяперашні час гэты чалавек утрымліваецца ў турэмнай камеры ў новым памяшканні казармы жандармерыі, якая знаходзіцца ў распараджэнні судовых органаў», — паведаміла Прэс-служба Святога Пасаду.
