7 сакавіка Папа Францішак абнавіў склад Рады кардыналаў па дапамозе ў кіраванні Касцёлам і рэформе Рымскай курыі. У яе ўвайшлі чатыры ранейшыя і пяць новых членаў.
Як паведаміла Беларуская рэдакцыя парталу Vatican News, бліжэйшымі дарадцамі Святога Айца сталі Дзяржаўны сакратар Яго Святасці кардынал П’етро Паралін, Старшыня Папскай камісіі па справах Дзяржавы Ватыкан і Губернатарата Дзяржавы Ватыкан кардынал Фэрнандо Вэргэс Альсага, арцыбіскуп Кіншасы з Дэмакратычнай Рэспублікі Конга кардынал Фрыдалін Амбонга Бэсунгу, арцыбіскуп Мумбая з Індыі кардынал Освальд Грасіяс, арцыбіскуп Бостана з ЗША кардынал Шон Патрык О’Мэлі, арцыбіскуп Барселоны з Іспаніі кардынал Хуан Хасэ Амэлья-і-Амэлья, арцыбіскуп Квэбека з Канады кардынал Жэрар Лакруа, арцыбіскуп Люксембурга кардынал Жан-Клод Ольрыш, арцыбіскуп Сан-Салвадора-да-Бая з Бразіліі кардынал Сэрджыу да Роша. Сакратаром структуры застаўся італьянскі біскуп Марко Мэліна.
Прэс-служба Святога Пасаду паінфармавала, што бліжэйшае пасяджэнне Рады кардыналаў пройдзе 24 красавіка ў ватыканскім Доме святой Марты — цяперашняй рэзідэнцыі Пантыфіка.
