З нагоды Шостага Сусветнага дня бедных, які сёлета адзначаўся 13 лістапада, Папа Францішак падзяліў абед з людзьмі ў патрэбе ў ватыканскай зале Паўла VI.
Як паведаміла Беларуская рэдакцыя парталу Vatican News, на святочны абед было запрошана каля 1300 бяздомных, мігрантаў, беспрацоўных і малазабяспечаных, якім дапамагаюць Caritas, Супольнасць святога Эгідыя і іншыя дабрачынныя арганізацыі. Многія з іх узялі ўдзел у святой Імшы, якую раніцай Пантыфік цэлебраваў у базыліцы святога Пятра.
Акрамя таго, да Сусветнага дня бедных на плошчы Святога Пятра была разгорнута мабільная клініка, у якой на працягу тыдня тыя, хто жыве ў нястачы, могуць атрымаць медыцынскую дапамогу. У клініцы выдаюцца лекі і праводзяцца медыцынскія агляды, у тым ліку скрынінг і лячэнне ВІЧ, гепатыту і туберкулёзу.
Сусветны дзень бедных быў устаноўлены Папам Францішкам у 2016 годзе на заканчэнне Надзвычайнага Юбілею Міласэрнасці. Ён адзначаецца ў Касцёле ў ХХХІІІ Звычайную нядзелю літургічнага года.
Па дадзеных каталіцкай дабрачыннай арганізацыі Caritas Italiana, у Італіі налічваецца 5,6 мільёна чалавек, якія жывуць у беднасці, з якіх 1,4 мільёна — дзеці.
