Святы Пасад выступіў з заявай, якая стала адказам на палеміку вакол словаў Папы Францішка на агульнай аўдыенцыі 24 жніўня адносна нападу, у выніку якога загінула Дар’я Дугіна. Яны выклікалі бурную рэакцыю ва Украіне.
Папа гаворыць як пастыр, які абараняе чалавечае жыццё, а не як палітык — і менавіта такое прачытанне яго шматлікіх выступленняў аб вайне ва Украіне з’яўляецца правільным. Гэта — асноўны пасыл тэксту, як зазначае Беларуская рэдакцыя парталу Vatican News.
«Святы Айцец Францішак і яго супрацоўнікі шмат разоў выступалі ў кантэксце вайны ва Украіне. Яны ставяць сваёй асноўнай мэтай запрашэнне душпастыраў і вернікаў да малітвы, а ўсіх людзей добрай волі — да салідарнасці і намаганняў па ўсталяванні міру», — гаворыцца ў заяве Святога Пасаду.
«Неаднаразова, таксама і ў апошнія дні, узнікала грамадская дыскусія наконт палітычнага значэння такіх выступленняў. У сувязі з гэтым хочам паўтарыць, што словы Святога Айца па гэтым драматычным пытанні павінны разглядацца як голас, узняты ў абарону чалавечага жыцця і звязаных з ім каштоўнасцяў, а не як палітычная пазіцыя», — працягваюць аўтары.
«Што датычыцца шырокамаштабнай вайны ва Украіне, распачатай Расійскай Федэрацыяй, выступленні Святога Айца Францішка ясна і адназначна асуджаюць яе як маральна несправядлівую, непрымальную, варварскую, бессэнсоўную, агідную і святатацкую», — заключаецца ў заяве Святога Пасаду.
