13 кастрычніка Папа Францішак прыняў на аўдыенцыі прэфекта Кангрэгацыі па справах кананізацыі кардынала Марчэло Сэмерара і даў дазвол абнародаваць дэкрэты адносна беатыфікацыі некаторых Слугаў Божых.
Як паведаміла Беларуская рэдакцыя параталу Vatican News, Святы Айцец ухваліў два дэкрэты аб пацвярджэнні цудаў.
Першы з іх датычыцца Слугі Божага Яна Паўла І (Альбіно Лучані) — Папы, чый пантыфікат быў адным з самых кароткіх у гісторыі і працягваўся ўсяго 33 дні.
Альбіно Лучані нарадзіўся ў 1912 годзе ў Канале Д’Агорда ў Італіі і памёр у 1978 годзе ў Ватыкане. Перад абраннем наступнікам святога Пятра ён быў біскупам Віторыя Вэнэта, а потым Патрыярхам Венецыі.
Другі дэкрэт аб прызнанні цуду, датычыцца калумбійскай законніцы сястры Марыі Бэрэніс Дзюке Хэнкер (свецкае імя Анна Хулія), заснавальніцы кангрэгацыі Малых Сясцёр Звеставання, якая нарадзілася ў 1898 годзе і памерла ў 1993 годзе.
Таксама асобным дэкрэтам была пацверджана мучаніцкая смерць двух місіянераў, забітых з нянавісці да веры ў 1683 годзе ў Аргентыне: дыяцэзіяльнага святара ксяндза Пэдро Артыса дэ Саратэ і айца езуіта Джаванні Антоніо Салінаса.
Чатыры дэкрэты, ухваленыя Папам Францішкам, датычацца прызнання гераічнасці цнотаў. Гаворка ідзе пра іспанскага дыяцэзіяльнага святара ксяндза Дыего Эрнандэса Гансалеса (1915–1976); італьянскага францішканіна айца Джузэпэ Спалецыні (1870–1951); французскую законніцу сястру Магдалену ад Езуса (свецкае імя Элізабэт Мары Мадлен Ютэн (1898–1989); а таксама італьянскую законніцу сястру Элізабэту Марцінэс (1905–1991), заснальніцу кангрэгацыі Дачок Найвяцейшай Марыі з Леўкі.
