З 23 па 26 верасня ў Рыме праходзіла чарговае пленарнае пасяджэнне Рады Канферэнцый Біскупаў Еўропы (РКБЕ), прысвечанае 50-годдздю існавання гэтай касцёльнай структуры. У пасяджэнні узяў удзел Старшыня Канферэнцыі Каталіцкіх Біскупаў у Беларусі біскуп Віцебскі Алег Буткевіч.
Рада Канферэнцый Біскупаў Еўропы — гэта структура, створаная падчас пантыфікату Папы Паўла VI для падтрымання сувязі і ўзаемадзеяння паміж епіскапатамі Еўропы. Яе мэта — спрыяць памнажэнню дабра Касцёла і абараняць яго.
Тэма сёлетняга пленарнага пасяджэння Рады — «РКБЕ: 50 гадоў на службе ў Еўропе. Памяць і перспектывы ў кантэксце энцыклікі Fratelli tutti».
У дакладах працоўных дзён асамблеі іерахі звярнулі асаблівую ўвагу на братэрстве і еднасці, падкрэслівалі важнасць мужнасці ў евангелізацыі і пошуку спосабаў перадачы веры новаму пакаленню.
Пасяджэнне распачалося святою Імшою ў ватыканскай базіліцы Святога Пятра, цэлебрацыю якой узначаліў Папа Францішак.
Пасяджэнне наведаў Дзяржаўны сакратар Яго Святасці Папы Францішка кардынал П’етро Паралін. Найбліжэйшы супрацоўнік Святога Айца вызначыў дзесяць кірункаў, у якіх еўрапейскія Касцёлы пакліканы дзейнічаць разам: фармацыя, братэрская дабрачыннасць, падтрымка сем’яў, абарона чалавечага жыцця, маладое пакаленне, увага да слабых і бедных, мігранты, адзінства хрысціянаў, клопат пра навакольнае асяроддзе і абарона міру.
На пасяджэнні новым старшынёй РКБЕ быў абраны Гінтарас Грушас, арцыбіскуп Віленскі. Яго намеснікамі сталі кардынал Жан-Клод Ольрыш, арцыбіскуп Люксембуржскі, і біскуп Ласло Нэмет, ардынарый дыяцэзіі Зрэняніна (Сербія).
Ісці разам з Божым народам заклікаў пастыраў новаабраны Старшыня РКБЕ ў нядзельнай гаміліі. Пры гэтым ён нагадаў словы Папы Францішка.
«Мы, пастыры, ідзем з людзьмі: часам спераду, часам усярэдзіне, часам ззаду.
Добры пастыр павінен рухацца так: наперадзе кіраваць, усярэдзіне заахвочваць і не забывацца пах статку, ззаду — таму што ў людзей таксама ёсць „нюх“. У іх ёсць нюх для пошуку новых дарог або для адшукання згубленай дарогі», — сказаў іерарх.
«Вернемся сёння ў нашыя краіны і нашыя дыяцэзіі, каб з новымі сіламі ісці разам гэтым шляхам да будучыні, кіруючыся Духам Божым і слухаючы Бога, які гаворыць праз Яго святы народ», — заключыў арцыбіскуп Грушас.
