Пандэмія аказала негатыўны ўплыў на сямейнае жыццё і падрыхтоўку да сакрамэнту сужэнства. На гэта ўказала Габрыэла Гамбіна, памочніца сакратара Дыкастэрыі па справах свецкіх, сям’і і жыцця.
Як падкрэсліла Габрыэла Гамбіна, словы якой прыводзіць Польская рэдакцыя парталу Vatican News, статыстыка распаду сужэнстваў сведчыць пра знішчальны ўплыў пандэміі і эканамічнага крызісу.
Аднак, на яе думку, сапраўдная прычына крызісаў крыецца ў адсутнасці надзеі на будучыню сярод маладога пакалення і адсутнасць даверу сакрамэнтальнай ласцы ў саміх сужэнствах.
Як падкрэсліла памочніца сакратара ватыканскага ведамства, праз сведчанні хрысціянскіх сем’яў Касцёл можа паказваць маладым парам прыгажосць сужэнства, якое з’яўляецца пакліканнем і сакрамэнтам. Для сужэнстваў, якія перажываюць крызіс і цяжкасці, трэба ствараць нагоды, дзякуючы якім яны змогуць паглыбляць давер да ласкі, што дзейнічае ў штодзённым жыцці, сярод розных абмежаванняў і праблем.
Па словах Габрыэлы Гамбіна, хрысціянскія нарачоныя і сужонкі сёння жывуць у культуры індывідуалізму, культуры паражэння і скарэння перад цяжкасцямі. «Таму так важна аднавіць у іх ласку сакрамэнту, якая ў хвіліны цяжкасцяў можа аздаравіць іх сем’і», — падкрэслівае супрацоўніца дыкастэрыі.
