Кардынал П'етро Паралін здзейсніў сямідзённы візіт у Камерун. Дзяржаўны сакратар Папы Францішка наведваў гэтую афрыканскую краіну з мэтай дапамагчы спыніць гвалт і наладзіць перамовы з сепаратыстамі.
Па словах іерарха, якія прыводзіць беларуская рэдакцыя парталу Vatican News, яго візіт быў выразам клопату Святога Айца пра Афрыку. Падчас шматлікіх сустрэч, як касцёльных, так і палітычных, ён запрашаў да навядзення мастоў і нагадваў пра неабходнасць павагі да асноўных правоў чалавека. Ватыканскі дыпламат таксама звяртаў увагу на недастатковасць проста заклікаць да міру: трэба будаваць яго трывала і цярпліва, абапіраючыся на асновы дыялогу і справядлівасці.
Кардынал Паралін наведаў, між іншым, горад Баменда, які знаходзіцца ў англамоўнай частцы Камеруна і з'яўляецца полем крывавых аперацый сепаратыстаў. Яны неахвотна пагадзіліся на візіт прадстаўніка Святога Пасаду.
Сепаратысты, абвінавачваючы Касцёл у тым, што ён не прыслухоўваецца да іх прэтэнзій і выступае на баку афіцыйных уладаў, заклікалі мясцовае насельніцтва байкатаваць любыя мерапрыемствы, звязаныя з прысутнасцю пасланца Папы Францішка.
Сепаратыстамі таксама быў затрыманы арцыбіскуп Дуалу на пенсіі, 90-гадовы кардынал Крысціян Тумі, які накіроўваўся ў Баменду для ўдзелу ў цырымоніі.
Сітуацыя на паўночным захадзе Камеруна пагоршылася ў канцы 2016 г., калі сепаратысты з так званай Рэспублікі Амбазоніі абвясцілі незалежнасць ад усходняй, бяднейшай часткі краіны. Трэба адзначыць, што з самага пачатку Касцёл выкрываў парушэнні правоў чалавека з абодвух бакоў канфлікту і імкнуўся да ўсталявання ўзаемаразумення і міру.
