1 лютага Папа прыняў на аўдыенцыі дэлегацыю Catholic News Service — інфармацыйнай службы Канферэнцыі Біскупаў ЗША. Сустрэча была прымеркавана да 100-годдзя з дня заснавання структуры.
Як паведамляе беларуская рэдакцыя парталу Vatican News, Святы Айцец заўважыў, што за час сваёй дзейнасці Catholic News Service «зрабіла каштоўны ўнёсак у англамоўны свет праз інфармаванне аб місіі Касцёла, скіраванай на абвяшчэнне Евангелля і сведчання любові Бога, адкрытай у Езусе Хрысце».
Папа пажадаў сваім гасцям, каб у эпоху, калі навіны з лёгкасцю «падвяргаюцца маніпуляцыі і распаўсюджанай з’яўляецца дэзінфармацыя», яны дапамагалі людзям пазнаваць праўду.
«Дзякую за вашу працу і заклікаю працягваць спрыяць дыялогу і сумленнай камунікацыі паміж людзьмі і супольнасцямі. Мы маем патрэбу ў медыя, якія змогуць дапамагчы людзям, асабліва моладзі, адрозніваць дабро ад зла, прыходзіць да здаровых суджэнняў, заснаваных на ясным і цэласным валоданні фактамі, а таксама прызнаваць важнасць працы на карысць справядлівасці, грамадскай згоды і павагі да нашага супольнага дома», — сказаў Пантыфік.
Ён пажадаў, каб дух адзінства з Біскупам Рыма, які заўсёды быў адметнай рысай Catholic News Service, дапамагаў журналістам інфармацыйнай службы служыць праўдзе з пакорай і адказнасцю.
