У Ватыкане пацвердзілі, што плануецца візіт Папы Францішка ў Ірак на пачатку сакавіка. 20 студзеня прэс-служба Святога Пасаду разаслала дакументы аб акрэдытацыі журналістам, якія жадаюць суправаджаць Пантыфіка ў яго падарожжы.
Як паведамляе каталіцкае інфармацыйнае агенцтва КАІ, дакладная праграма візіту, які плануецца з 5 па 8 сакавіка, невядомая. Пакуль згадваюцца Багдад, Эрбіль, Масул, Каракош і Ур. Кожнаму ўдзельніку паездкі неабходна будзе зрабіць прышчэпку ад каранавірусу.
Яшчэ ў сярэдзіне студзеня Папа сказаў, што не ўпэўнены, што яго паездка ў Ірак адбудзецца.
Сярод іншага ён растлумачыў, што не хоча збіраць людзей з-за пандэміі.
Гэтае падарожжа можа стаць першым у гісторыі візітам Святога Айца ў Ірак. Акрамя пандэміі, вялікай праблемай для арганізатараў з’яўляецца арганізацыя бяспекі як самога Папы, так і ўсіх, хто хацеў бы з ім сустрэцца.
