Керамічная батлейка, усталяваная сёлета на плошчы Святога Пятра ў Ватыкане, у многіх людзей выклікае здзіўленне і незразуменне.
Рэлігійна-інфармацыйная служба Украіны risu.ua адзначае, што калядная інсталяцыя ў цэнтры Рыма аказалася аб’ектам крытыкі з боку многіх католікаў.
«Футурыстычная керамічная батлейка з касманаўтам і персанажам, падобным да Дарта Вэйдэра з „Зорных войнаў“, сутыкнулася з такой хваляй крытыкі, што, калі б гаворка ішла пра брадвейскі спектакль, ён бы зачыніўся ў дзень прэм’еры», — піша Reuters.
Персанажы батлейкі, выкананыя з керамікі, нагадваюць кубічныя фігуры. Паводле яе стваральнікаў, іх натхніла грэцкая, шумерская і егіпецкая культуры.
На думку выдання The Times, адна са скульптур падобная да Дарта Вэйдэра з Lego. Побач з ім стаіць касманаўт.
Батлейку, якая сёлета была ўсталявана на плошчы Святога Пятра, стварылі ў перыяд з 1965 па 1975 год студэнты і выкладчыкі інстытуту мастацтваў з Кастэллі (Абруцца, Італія).
