Святы Пасад апублікаваў даклад па справе былога кардынала і арцыбіскупа Вашынгтонскага, выдаленага з духоўнага стану. Гэты дакумент Дзяржаўны сакратарыят рыхтаваў ад імя Пантыфіка на працягу двух гадоў.
Пра гэта паведамляе беларуская рэдакцыя парталу Vatican News. Даклад аб інстытуцыйных ведах і працэсе прыняцця рашэнняў Святога Пасаду адносна былога кардынала Тэадора Эдгара Маккарыка — так гучыць поўная назва дакумента — датычыць перыяду з 1930 па 2017 год.
Гэтая справаздача — своеасаблівы адказ на абавязацельства Папы Францішка правесці дбайнае расследаванне справы Маккарыка, вінаватага ў сексуальных злоўжываннях адносна непаўнагадовых і дарослых.
У дакуменце называюцца памылкі, якія дазволілі чалавеку, вінаватаму ў такога роду злачынствах, заняць высокія пасады ў іерархіі.
З гэтага ўжо былі зроблены высновы і рэалізаваны новыя касцёльныя нормы.
Адзначаецца, што да 2017 г. адсутнічалі грунтоўныя заявы адносна злоўжыванняў, учыненых Маккарыкам. Першае грунтоўнае абвінавачанне прагучала тры гады таму і прывяло да неадкладнага адкрыцця кананічнага працэсу, увянчанага двума паслядоўнымі рашэннямі Папы Францішка, які спачатку выдаліў Маккарыка з Калегіі кардыналаў, а потым і з духоўнага стану.
Меры, прынятыя Пантыфікам пасля саміту па абароне непаўнагадовых у лютым 2019 г., можна разглядаць у святле гэтай падзеі, уключаючы адмену папскай таямніцы ў выпадках сексуальнага гвалту.
«Як відаць з асноўнай часткі Дакладу і колькасці дакументаў і інфармацыі, якія ў ім змяшчаюцца, мы рушылі ў пошуках ісціны», — сцвердзіў у спецыяльнай заяве Дзяржсакратар Яго Святасці кардынал П’етро Паралін.
«Мы публікуем Даклад з болем ад ран, якія Маккарык нанёс ахвярам, іх сем’ям, Касцёлу ў ЗША, Паўсюднаму Касцёлу.
Як і Папа, я таксама змог азнаёміцца са сведчаннем ахвяр, што змяшчаюцца ў актах, на якіх заснаваны Даклад і якія захоўваюцца ў архівах Апостальскай Сталіцы», — сказаў іерарх. Ён лічыць, што для выключэння такога роду з’яў у будучыні, разам з больш эфектыўнымі нормамі, патрэбна навяртанне сэрцаў.
