Арцыбіскуп Георг Генсвайн, асабісты сакратар Папы на пенсіі Бэнэдыкта XVI, абверг інфармацыю пра нібыта сур’ёзнае пагаршэнне стану яго здароўя.
У апошні час у некаторых рэсурсах у Італіі і ў іншых краінах з’явілася інфармацыя пра нібыта сур’ёзнае пагаршэнне стану здароўя Бэнэдыкта XVI, які пасля выхаду на пенсію жыве ў кляштары Mater Ecclesiæ на тэрыторыі Ватыкана.
Як паведаміла Каталіцкае інфармацыйнае агенцтва КАІ, увечары 29 кастрычніка вядомы французскі ватыканіст Антуан-Мары Ізаар напісаў на сваёй старонцы ў Твітары, што па словах асабістага сакратара Бэнэдыкта XVI арцыбіскупа Георга Генсвайна інфармацыя пра тое, што ён нібы заклікаў да асаблівай малітвы за Папу на пенсіі ў сувязі з раптоўным пагаршэннем яго здароўя, з’яўляецца «фальшывай плёткай».
Варта адзначыць, што падобныя фэйкавыя паведамленні пра стан здароўя Бэнэдыкта XVI з’яўляюцца ўжо не ўпершыню.
