3 жніўня ў некаторых СМІ з’явіліся паведамленні пра нібыта сур’ёзнае пагаршэнне стану здароўя Папы на пенсіі Бэнэдыкта XVI, якія былі абвергнуты з афіцыйных крыніц.
«Стан здароўя Бэнэдыкта XVI не выклікае асаблівай занепакоенасці», — сказаў асабісты сакратар Пантыфіка пенсіянера арцыбіскуп Георг Генсвайн, словы якога перадае Аvvenire.
Прэс-служба Святога Пасаду распаўсюдзіла спецыяльнае паведамленне арцыбіскупа Генсвайна, у якім сцвярджаецца, што 93-гадовы Бэнэдыкт XVI «перажывае абвастрэнне балючай, але не сур’ёзнай хваробы».
Пры гэтым, аднак, не паведамляецца, пра якую канкрэтна хваробу ідзе гаворка, з павагі да ўрачэбнай таямніцы і асабістага жыцця Папы на пенсіі.
Звесткі пра нібыта сур’ёзнае захворванне Бэнэдыкта XVI з’явіліся ў адным з нямецкіх СМІ, які спасылаўся на папскага біёграфа Петэра Зеевальда, які ў мінулыя дні быў у Ватыкане. Як паведамляецца ў выданні, ён сказаў, што Бэнэдыкт XVI меў «аптымістычны настрой, нягледзячы на хваробу».
