Рэсурс, размешчаны па адрасе Vaticanlibrary.va, — з палепшанай графікай і больш простым доступам да кантэнту і паслуг бібліятэкі, — даступны ў сеціве з 16 ліпеня.
Беларуская рэдакцыя парталу Vatican News перадае, што прэфект Ватыканскай апостальскай бібліятэкі распавёў пра новы сайт установы.
Па словах мансеньёра Чэзарэ Пазіні, у новай версіі распрацавана больш простая і інтуіцыйна зразумелая працэдура замовы рэпрадукцый манускрыптаў і іншых матэрыялаў бібліятэкі. Больш за тое, сайт дазваляе ўзаемадзейнічаць з іншымі падключанымі інфармацыйнымі анлайн-сістэмамі. Гэта датычыцца, напрыклад, каталагавых пошукавых сістэм і лічбавай бібліятэкі, атрымання даведак у рэакцыйным каталогу, сістэмы анлайн-пакупак.
«Часткова гэта статычны ўэб-рэсурс: тут ёсць тэксты, якія можна пачытаць, і выявы, якія можна паглядзець. Аднак трэба ажыццяўляць і даследаванні, і гэта патрабавала інавацый, якія мы рэалізавалі на новым сайце», — зазначыў святар.
«Мы хочам насамрэч служыць нашым наведвальнікам пры дапамозе сучаснага і актуальнага інструмента, які б імгненна прапаноўваў тое, што чалавек шукае, а, магчыма, нават даваў штосьці большае. Гэтым сайтам мы хочам прадэманстраваць тое, кім мы ёсць і чым валодаем, прапанаваць служэнне, якое б пашырыла межы свету», — кажа прэфект.
Па словах мансеньёра Пазіні, такое жаданне сугучнае з вучэннем Папы Францішка аб неабходнасці выхаду на перыферыі свету.
«Я веру, што няма нічога роўнага анлайн-рэсурсу, што б дазволіла патэнцыяльна дасягнуць усіх межаў і ўсіх краін зямнога шару, блізкіх і далёкіх. Канешне, мы не занядбалі і рэальнай паслугі тым, хто прыходзіць да нас, і стараемся рабіць гэта добра.
Але асабліва ў перыяд цяперашняй надзвычайнай эпідэміялагічнай сітуацыі, калі мабільнасць людзей абмежавана <…>, гэты сайт, адкрыты і камунікацыйны, багаты і цікавы, задуманы як месца гасціннасці, супрацоўніцтва і адкрытасці», — сказаў прэфект Ватыканскай апостальскай бібліятэкі.
