Улічваючы сітуацыю пагрозы здароўю, Папа Францішак вырашыў, што сёлета збор ахвяраванняў на Апостальскую Сталіцу, які традыцыйна адбываецца ва ўрачыстасць святых Пятра і Паўла, апосталаў, 29 чэрвеня, будзе перанесены ва ўсім свеце на XXVII нядзелю звычайнага перыяду, 4 кастрычніка, калі Касцёл успамінае святога Францішка Асізскага.
Як паведамляе агенцтва КАІ, у нядаўнім інтэрв'ю прэфект Сакратарыяту Святога Пасаду па справах эканомікі айцец Хуан Антоніо Герэра Альвес SІ сказаў: «Наперадзе нас чакаюць цяжкія гады. Чакаецца, што з-за пандэміі даходы ўпадуць ад 25 да 45 працэнтаў, але гэта не азначае змяншэння заробнай платы і аказання дапамогі бедным».
Кажучы пра ўплыў глабальнага крызісу, выкліканага пандэміяй каранавірусу, на фінансавае становішча Святога Пасаду і Дзяржавы Ватыкан, а. Герэра Альвес адзначыў, што сёння немагчыма сказаць, ці адбудзецца памяншэнне ахвяраванняў або памяншэнне выплат з боку дыяцэзій.
Штогод 29 чэрвеня традыцыйна збіраюцца ахвяраванні ва ўсіх каталіцкіх дыяцэзіях свету.
Сабраныя грошы — гэта «фінансавая дапамога Святому Айцу» для задавальнення патрэбаў паўсюднага Касцёла і на справы міласэрнасці дзеля патрабуючых.
Гэтае ахвяраванне ўспрымаецца як даніна з боку краін, якія аддалі сябе пад апеку Святога Пасаду. Пачатак яму быў пакладзены ў VIII стагоддзі англа-саксонскімі кіраўнікамі, хрысціянізаванымі ў той час. У такім выглядзе ахвяраванне захавалася да часоў Рэфармацыі, пасля чаго знікла, галоўным чынам з-за хвалі крытыкі папскіх інстытутаў, а таксама з-за павелічэння незалежнасці свецкіх (у тым ліку каталіцкіх) кіраўнікоў краін.
Прынясенне «ахвяравання святога Пятра» было адноўлена ў 1871 годзе Піем IX у якасці звычаю фінансавай падтрымкі Святога Пасаду, які на працягу больш чым 20 гадоў у сваіх штогадовых фінансавых справаздачах падае суму атрыманых ахвяраванняў. Акрамя чыста дабрачынных мэтаў, частка сродкаў прызначаецца часам на агульную працу Ватыкана.
