8 чэрвеня года ў Ліхэні (Польшча) у супольнасці ксяндзоў марыянаў біскуп Віцебскі Алег Буткевіч удзяліў дыяканскае і прэзбітэрскае пасвячэнне. Адзін з новапасвячаных — ураджэнец Беларусі.
Як паведамляе партал Catholicnews.by, двое дыяканаў — Матэуш Цялецкі і Лукаш Гай — сталі прэзбітэрамі, а яшчэ двое іх сабратоў — Ілля Саўчанка і Каспер Паўляк — прынялі сакрамэнт пасвячэння ў ступені дыяканату.
Новапасвячаны дыякан Ілля Саўчанка МІС паходзіць з парафіі Найсвяцейшай Тройцы ў Глыбокім.
Біскуп Алег Буткевіч удзяліў сакрамэнт пасвячэння падчас урачыстай св. Імшы ў санктуарыі Маці Божай Ліхэньскай.
На заканчэнне ўрачыстасці іерарх падзякаваў прадстаўнікам гэтай законніцкай супольнасці за служэнне ў Беларусі асабліва ў савецкія часы пераследу, а таксама ўзгадаў пра росіцкі санктуарый, які знаходзіцца на тэрыторыі Віцебскай дыяцэзіі, дзе і сёння нясуць служэнне марыяне. Пастыр нагадаў, што сёлета прыпадае 20-годдзе беатыфікацыі марыянскіх святароў мучанікаў з Росіцы.
