З 7 па 9 чэрвеня ў цэнтры Caritas Мінска-Магілёўскай архідыяцэзіі ў Ляскоўцы адбыўся IV агульнабеларускі кангрэс сямейных рухаў, арганізаваны Радай па справах сям’і пры Канферэнцыі Каталіцкіх Біскупаў у Беларусі.
Сёлетні кангрэс быў прысвечаны тэме «Бацькі і дзеці». У ім удзельнічала каля 100 чалавек з розных месцаў Беларусі.
Пасля прывітання ўдзельнікаў старшынёй Рады па справах сям’і біскупам Антоніем Дзям’янкам выступіў з дакладам на распачацце кангрэсу кс. Андрэй Рылка.
Кульмінацыйным пунктам першага дня кангрэсу была святая Імша, якую ўзначаліў біскуп Антоні Дзям’янка. У гаміліі іерарх засяродзіў увагу на пачатках паклікання да жыцця ў сям’і, якая паходзіць ад Бога, і на тым, што асновай сужэнства з’яўляецца сакрамэнт.
У наступныя два дні адбыліся выступленні дакладчыкаў з Беларусі, Расіі, Украіны, Польшчы і Аўстрыі. Удзельнікі разважалі над такімі тэмамі, як сем’і алкаголікаў, Бог і міласэрнасць у адносінах бацькоў і дзяцей, дзіця ў дысфункцыйнай сям’і, небяспечныя паводзіны дзяцей і моладзі, звязаныя з віртуальным светам, бацькі і дзеці ўнутры нас.
Арганізатары запланавалі даклады так, каб паказаць цяжкасці ў выхаванні дзяцей, асабліва праблему карыстання дзяцей смартфонамі, інтэрнэтам, грамадскімі камукацыямі.
Як было адзначана, менавіта віртуальны свет становіцца перашкодай у стварэнні належных адносін паміж дзецьмі і бацькамі.
Гэтым разам выступоўцы не толькі паказалі звязаныя з гэтым пагрозы, але і далі канкрэтныя прапановы, як справіцца з цяжкасцямі. Важна ўсведамляць, што Касцёл жывы і прапануе сем’ям рэалістычны кірунак дзеянняў.
Кангрэс стаў магчымасцю сустрэч, размоваў абмену досведам, звязаным з выхаваннем дзяцей.
У апошні дзень падчас заняткаў пад назвай «Суперцесць, суперцешча» інструктары даступным спосабам прадставілі паводзіны паміж маладымі сужэнцамі і іх бацькамі і патлумачылі, што рабіць, каб адносіны былі выпраўлены.
Завяршыўся кангрэс святой Імшой у інтэнцыі сем’яў, яго ўдзельнікаў і арганізатараў.
