2 чэрвеня ў парафіі св. Андрэя, апостала, у Лынтупах (Пастаўскі дэканат, Віцебская дыяцэзія) прайшло свята, прысвечанае Дню абароны дзяцей. Удзел у ім прынялі каля 100 дзяцей з Лынтупаў і Палесся.
Свята пачалося Імшой, падчас якой пробашч парафіі кс. Аляксандр Баран маліўся за дзяцей. Сустрэча працягнулася ў парафіяльным араторыі. Ксёндз Аляксандр выступіў са зваротам да дзяцей і бацькоў.
Дзеці парадавалі ўсіх прысутных сваім выступленнем. На свяце былі танцы, песні, сцэнка, конкурсы. На заканчэнне падвялі вынікі працы араторыя за год. Усе дзеці, якія бралі актыўны ўдзел у жыцці араторыя, атрымалі прызы. Аніматары «Дабрыні» таксама атрымалі падарункі за дапамогу ў працы з малодшымі дзецьмі.
Свята завяршылася пачастункам. Усім дзецям і дарослым яно вельмі спадабалася.
Удзельнікі свята ўдзячныя дыяцэзіяльнаму Caritas і ўсім спонсарам за фінансавую дапамогу ў арганізацыі, багата накрыты стол, прызы і падарункі.
Таксама дабрачыннае каталіцкае таварыства Caritas Віцебскай дыяцэзіі пры спонсарскай дапамозе Caritas Прагі (Чэхія) рэгулярна арганізуе адпачынак і дабрачынныя акцыі для дзяцей са шматдзетных, няпоўных, апякунскіх, прыёмных сем’яў.
Да Дня абароны дзяцей быў арганізаваны бясплатны паход у кіно.
Хлопчыкі і дзяўчынкі з задавальненнем паглядзелі мастацкі фільм «Аладзін». Дзеці засталіся задаволеныя і прызналіся, што выдатна правялі час.
