Пошук


03.06.2019 11:43   Тэкст і фота: Ганна Якімовіч / Catholic.by

З 22 па 28 мая ў Рыме адбыліся дзве важныя падзеі ў жыцці дабрачыннага каталіцкага таварыства Caritas. Першай была рэгіянальная канферэнцыя Caritas Еўропы, другой — Генеральная асамблея Caritas Internationalis (Сусветная арганізацыя Caritas).

Падчас рэгіянальнай канферэнцыі дэлегаты падзякавалі былому Генеральнаму сакратару Caritas Еўропы Хорхе Нуно Маеру за дзевяць гадоў самаахвярнай працы і абралі новага кіраўніка арганізацыі — Марыю Нюман з Бельгіі. Таксама была зацверджана стратэгія развіцця арганізацыі да 2023 года.

ХХІ Генеральная асамблея Caritas Internationalis адбылася пад лозунгам «Адзін чалавечы род, адзін агульны дом».

23 мая з нагоды адкрыцця асамблеі папа Францішак цэлебраваў у базыліцы св. Пятра ў Ватыкане святую Імшу, а 27 мая прыняў на аўдыенцыі 400 удзельнікаў асамблеі з розных краін свету, у тым ліку з Беларусі.

Святы Айцец заклікаў удзельнікаў асамблеі выконваць сваё служэнне ў духу «убоства, падзякі і пакоры», наладжваць міжасобасныя адносіны з беднымі, якія з’яўляюцца не лічбамі ў справаздачах, а жывымі людзьмі, а таксама пазбягаць спакусы ператварэння свайго служэння ў бізнэс.

«Міласэрнасць, — падкрэсліў Папа, — гэта не ідэя і не поўнае глыбокай пашаны пачуццё, а жывая сустрэча з Хрыстом.

Гэта жаданне жыць сэрцам Бога і прасіць не аб тым, каб мы адчувалі да бедных любоў, сяброўства і салідарнасць увогуле, а аб тым, каб неслі іх да гэтых людзей у духу ўбоства Яго самога».

    

Сустрэча са Святым Айцом — незабыўная падзея і для прадстаўнікоў Caritas Беларусі, якія ўдзельнічалі ў працы Генеральнай асамблеі.

Абноўлена 03.06.2019 11:57
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.