27–28 мая ў рэкалекцыйным доме пры дыяцэзіяльным санктуарыі Маці Божай Каралевы нашых сем’яў у Тракелях прайшла фармацыйная сустрэча для святароў Гродзенскай дыяцэзіі ад 1 да 8 гадоў святарства.
Як паведамляе партал Гродзенскай дыяцэзіі Grodnensis.by, тэма, якой была прысвечана сустрэча, — катэхеза ў душпастырскім служэнні Касцёла.
У межах сустрэчы кс. Ян Сарэла, адказны за пастаянную фармацыю святароў у Гродзенскай дыяцэзіі, прамовіў настаўленне на тэму: «Катэхетычнае служэнне святара». Прэфект Міждыяцэзіяльнай вышэйшай духоўнай семінарыі ў Гродне кс. Андрэй Лішко выступіў з лекцыяй «Езус Хрыстус — найлепшы Катэхет. Катэхетычная дзейнасць Настаўніка. Паспяховыя і няўдалыя катэхезы Езуса». Пасля адбылася дыскусія.
Прэфект семінарыі ўказаў на розныя формы і сродкі катэхезы, якую вёў Езус, а таксама адзначыў, што няўдачы ў катэхетычнай дзейнасці не трэба ўспрымаць як нешта негатыўнае.
Па словах святара, няўдача з’яўляецца найперш вынікам супрацьстаяння кожнага катэхета з тым, што ў ім «цёмнае», складанае.
Гэта сустрэча тварам у твар з уласнымі комплексамі і перашкодамі. Таксама гэта ўсведамленне таго, колькі яшчэ ў нас пыхі, агрэсіі, недахопу талерантнасці і прыняцця іншых людзей. Ужо толькі гэтага, як адзначыў кс. Лішко, дастаткова, каб лічыць няўдачы Божым благаслаўленнем.
Практычная частка сустрэчы была прысвечана тэме «Інтэрнэт для катэхезы — шанц ці пагроза?».
На заканчэнне сустрэчы адбылася святая Імша, цэлебрацыю якой узначаліў біскуп Гродзенскі Аляксандр Кашкевіч.
Іерарх адзначыў важнасць паглыблення духоўнага жыцця і выхавання святарскай культуры.
